Jalaqynyń naqty mólsheri áleýmettik aýdarymdarmen rastalady
1 qańtardan bastap júktilik jáne bosaný boıynsha bir rettik eń joǵary tólem mólsheri ósedi, dep habarlaıdy Almaty-akshamy.kz Egemen.kz-ke silteme jasap.
Qazir tabysy 7 eń tómengi jalaqydan (297 500 teńgeden joǵary) asatyn áıelder 1 124 550 teńge ala alady (42 500*7*4,2-10%), jańa jyldan bastap eń tómengi jalaqy 42 500-den 60 000 teńgege deıin kóterilýine baılanysty bul soma 1 587 600 teńgege deıin ósedi (60 000*7*4,2-10%).
Eńbek mınıstrliginiń baspasóz qyzmeti memlekettik áleýmettik saqtandyrý qorynan júktilikke jáne bosanýǵa, jańa týǵan balany (balalardy) asyrap alýǵa baılanysty tabysynan aıyrylǵan jaǵdaıda tólenetin áleýmettik tólemniń mólsheri áleýmettik aýdarymdar júrgizilgen tabysqa tikeleı baılanysty ekenin habarlady.
«Áleýmettik aýdarymdar eń tómengi 1 jalaqydan (2021 jyly 42 500 teńge, 2022 jyldan bastap 60 000 teńge) jáne 7 eń tómengi jalaqydan (2021 jyly 297 500 teńge, 2022 jyldan bastap 420 000 teńge) aspaıtyn kiristen tólenedi», dep habarlady mınıstrlik.
Mysaly, eger áıeldiń bir jyl boıy aı saıyn 500 000 teńge kóleminde tabysy bolsa jáne 126 kúntizbelik kún tolyq mólsherde júktiligi jáne bosanýy boıynsha demalys alatyn bolsa, onda tólem bylaı esepteledi:
500 000 * 4,2 – 10% = 1 890 000 tg.
Bul soma jumys isteıtin áıelder úshin júktilik jáne bosaný boıynsha birrettik tólemniń eń joǵary mólsherinen asady. Osy somadan áıel eń joǵary tıisti tólemdi alady – 2021 jyly 1 124 550 teńge jáne 2022 jyly 1 587 600 teńge.
Qalǵan somany (765 450 jáne 302 400 teńge) jeke eńbek shartynda kórsetilgen bolsa, jumys berýshi tóleýi múmkin.
Eger somany esepteý kezinde ártúrli jyldardaǵy aılar qamtylsa, eń tómengi aılyq jalaqy sol jyldaǵy kórsetkish boıynsha esepteledi (2021 jyly 42 500 teńge jáne 2022 jyly 60 000 teńge).
Atalǵan tólemniń mólsheri júktilikke jáne bosanýǵa baılanysty demalysty resimdegen aıdyń aldyndaǵy sońǵy 12 aıda qorǵa áleýmettik aýdarymdar júrgizilgen ortasha aılyq tabystyń mólsherin eńbekke jaramsyzdyq kúnderi sanynyń tıisti koefısıentine kóbeıtý jolymen aıqyndalady ("mindetti áleýmettik saqtandyrý týraly" zańnyń 23-babynyń 3-tarmaǵy).
Jalaqynyń naqty mólsheri áleýmettik aýdarymdarmen rastalady. Bul esepteý kezinde tabys mólsheri kórsetilgen kezeńde qorǵa túsken áleýmettik aýdarymdar boıynsha anyqtalatynyn bildiredi.
Eńbek mınıstrligi áleýmettik tólemniń mólsheri ár adamǵa jeke esepteletinin, ony anyqtaý úshin ortasha aılyq kiristi jáne sońǵy 12 aıda áleýmettik aýdarymdar júrgizilgen eńbekke jaramsyzdyq kúnderi sanynyń koefısıentin arttyrý qajet ekenin atap ótti.