Amerıkalyq ınjener Soltústik Kalıfornıada ótken dástúrli alyp asqabaqtardy ólsheý jarysynda bas júldeni jeńip aldy, dep habarlaıdy aqshamnews.kz Rossııskaıa gazetaǵa silteme jasap.
Ol ósirgen asqabaqtyń salmaǵy — 1064 kılogramm.
Associated Press agenttiginiń habarlaýynsha, Kalıfornıa turǵyny Brendon Doýson 52-shi álem chempıonatynda jeńimpaz atandy. Injener ósirgen bul alyp asqabaqtyń salmaǵy shaǵyn jeńil kóliktiń nemese eresek bızonnyń salmaǵyna teń.
Doýsonnyń aıtýynsha, ol baqsha sharýashylyǵymen, sonyń ishinde iri asqabaq ósirýmen, bes jyldan beri aınalysady. Injener óziniń elektromobıl shyǵaratyn kompanıadaǵy jumysy kezinde alǵan daǵdylary bul iste kóp kómegin tıgizetinin aıtty. Jeńisi úshin ol 20 myń dollar kóleminde syıaqyǵa ıe boldy.
Ótken jyly Doýsonnyń asqabaǵy Mınnesota shtatyndaǵy muǵalim Trevıs Gınger ósirgen 1121 kılogrammdyq asqabaqtan jeńilgen bolatyn. Gınger 2023 jyly Kalıfornıadaǵy jarysta rekord ornatqan edi — onyń alyp asqabaǵy 1247 kılogramm tartqan. Alaıda bıyl onyń asqabaǵy maýsym basynda zaqymdanyp, jarys erejesine saı qatysý múmkindiginen aıyryldy.