11-19 qazan aralyǵynda Almaty Arena-da Almaty Open ATP 250 tenıs týrnıri ótip jatyr. Álemge áıgili Dımash Qudaıbergen sportshylarǵa qoldaý bildirip, keshe arenada óner kórsetti. Tolyǵyraq Aqshamnews.kz materıalynda.
Nebári eki kún buryn AQSH pen Meksıkadaǵy aýqymdy gastrólderin aıaqtap, ótken túnde ǵana úıine oralǵan ánshi óz jerinde óner kórsetýge asyqqanyn aıtty.
"Qaıda bolsam da, óz úıimde óner kórsetýge asyǵamyn! Bul - men úshin mártebe!" - dedi ol.
Ol alańǵa shyqqan sátte trıbýnalardan shapalaqtyń daýsy tyıylmady. Ánshi keıingi shyqqan 4 ánin oryndap, tyńdarmandarynyń ystyq yqylasyna bólendi.
Odan keıin júrgizýshelir Dımashqa oıyn týraly birneshe suraq qoıdy. Óner ıesi tenıske asa qyzyqpasa da, árbir qazaqstandyq sportshyny shyn kóńilmen qoldaıtynyn jasyrmady.
"Tenıstiń úlken jankúıeri emespin, týrnırlerdi muqıat qadaǵalamaımyn dep aıtaıyn. Biraq árbir qazaqstandyq sportshyǵa jankúıermin. Múmkindik týa qalsa, raketkany qolyma alyp, oınaǵandy unatamyn. Árıne, Qazaqstan týy astynda barlyq sport túrinde óner kórsetetin jigitterimiz ben qyzdarymyzǵa árqashan sáttilik tileımin!" - dedi ol.
Dımash óner kórsetip bolǵan soń, kortqa qazaqstandyq tenısshi, álemniń 91-raketkasy Aleksandr Shevchenko men álemniń 79-raketkasy, serbıalyq Laslo Djere shyqty.
Dımash Qudaıbergen Qazaqstan tenıs federasıasynyń prezıdenti ári kásipker Bolat Ótemuratovpen birge oıyn tamashalady.
Tartysty ótken eki partıa da Shevchenkonyń paıdasyna sheshildi, esep 7:6 (7; 1), 7:6 (14:12) boldy. Eki saǵat 6 mınýtqa sozylǵan básekede Aleksandr Shevchenko 10 eıspen birge 3 breıktiń bireýin paıdalanyp, jeńiske jetti.
Endi sportshy shırek fınalǵa shyǵý úshin álemniń 41-raketkasy, fransıalyq Korenten Mýtemen kezdesedi.