Almaty qalasyndaǵy №196 jalpy bilim beretin mektepte 13–23 qazan aralyǵynda Respýblıka kúnine arnalǵan patrıottyq jáne mádenı is-sharalar legi ótip jatyr, - dep habarlaıdy Aqshamnews.kz.
Merekeniń basty maqsaty – oqýshylardyń boıynda otansúıgishtik sezimdi, azamattyq jaýapkershilik pen el taǵdyryna beıjaı qaramaý qasıetterin qalyptastyrý boldy.
İs-sharalar aıasynda 1–11 synyp oqýshylaryna Táýelsizdik pen egemendik taqyrybyndaǵy ashyq sabaqtar uıymdastyryldy. 4-synyp oqýshylarynyń «Meniń elim – meniń otbasym» atty sýret kórmesi kórermenderdiń kóńilinen shyǵyp, jas qylqalam sheberleriniń elge degen súıispenshiligin aıqyndady. 5-synyp oqýshylarynyń «Qyran elim – Qazaqstanym!» fleshmoby men joǵary synyp oqýshylarynyń «Qazaqstan bolashaǵy» atty esse baıqaýy mekteptiń merekelik rýhyn odan ári arttyra tústi. Úzdik shyǵarmalar avtorlary marapattalyp, jumystar áleýmettik jelilerde jarıalandy.
Oqýshylar tek mektep qabyrǵasynda ǵana emes, qoǵammen de baılanys ornatty. 7-synyp oqýshylary aýdan ardagerlerine arnaıy baryp, ónerlerin kórsetti, jyly lebizderin bildirip, qarıalardyń batasyn aldy. Al 10-synyptar «Dámdi Qazaqstan» ulttyq taǵamdar festıvali aıasynda túrli ulttardyń as mázirin tanystyryp, el birliginiń dámin usyndy. Sonymen qatar, mektepishilik sporttyq jarystar men ustazdardyń «Meniń elim osyndaı!» ánimen shyrqaǵan hory merekeniń ajaryn ashty.
Respýblıka kúnine arnalǵan barlyq is-sharalar oqýshylardyń ulttyq sana-sezimin nyǵaıtyp, elge degen súıispenshiligin arttyrýǵa baǵyttaldy. Mektep ujymy men oqýshylary uıymdastyrǵan merekelik sharalar el birliginiń, tatýlyq pen patrıotızmniń jarqyn kórinisine aınaldy.