Almaty qalasynda jergilikti turǵyn jańa engizilgen QR Qylmystyq kodeksiniń 232-1-baby boıynsha qylmystyq jaýapkershilikke tartyldy.
Atalǵan bap óz bank nemese tirkeý derekterin quqyqqa qarsy maqsattarda paıdalanýǵa berýge tyıym salady, - dep habarlaıdy Aqshamnews.kz.
Eske sala keteıik, "dropperler" dep atalatyn tulǵalarǵa qatysty qylmystyq jaýapkershilik 2025 jylǵy 16 qyrkúıekten bastap engizilgen. Jańa norma alaıaqtardyń urlanǵan aqshany qolma-qol aqshaǵa aınaldyrýyna nemese basqa shottarǵa aýdarýyna múmkindik beretin qarjylyq deldaldardyń áreketine tosqaýyl qoıýdy kózdeıdi. Tergeý barysynda jeke kásipker óz tirkeý derekteri men QR-kodyn belgisiz adamdarǵa bergeni anyqtaldy. Osy derekter arqyly alaıaqtyq belgileri bar kúmándi aqsha aýdarymdary júzege asyrylǵan. Jedel-izdestirý is-sharalarynyń nátıjesinde áıel ustalyp, ýaqytsha ustaý ızolátoryna qamaldy.
-Bul – zańsyz qarjylyq operasıalar úshin banktik derekterin paıdalanýǵa bergen jeke adamnyń qylmystyq jaýapkershilikke tartylyp, qamaýǵa alynǵan elimizdegi alǵashqy oqıǵa. Jańa norma buǵan deıin jaýapkershilikten tys qalyp kelgen qarjylyq alaıaqtyq tizbegin tıimdi túrde toqtatýǵa múmkindik beredi. Polısıa osyndaı quqyq buzýshylyqtardyń aldyn alý baǵytyndaǵy jumystardy qatań túrde jalǵastyrady, – dedi Alataý aýdandyq polısıa basqarmasy bastyǵynyń mindetin atqarýshy Tımýr Mýlınov.
Almaty qalalyq polısıa departamenti azamattarǵa ózderiniń bank jáne tirkeý derekterin bógde adamdarǵa bermeýdi eskertedi. Mundaı áreket, shot ıesi paıda tappaǵan jaǵdaıdyń ózinde, qylmysqa qatystylyq retinde qarastyrylýy múmkin.