Bıyl UBT beınejazbalarynyń bir bóligin egjeı-tegjeıli qarap shyqqannan keıin, 19 talapkerdiń shpargalka qoldanǵany jáne erejelerdi buzǵany anyqtalyp, olardyń nátıjeleri joıyldy.
UBT aıaqtalǵannan keıin 152 talapkerdiń testileý erejesin buzǵany anyqtaldy, olardyń 91-i bilim berý grantynan aıyryldy, dep habarlaıdy Almaty-akshamy.kz QR BǴM baspasóz qyzmetine silteme jasap.
Ótken jyly baqylaý kameralarynan beınejazbalardy qaraý týraly ereje engizilgen bolatyn. UBT aıaqtalǵannan keıin Ulttyq testileý ortalyǵynyń qyzmetkerleri 145 myń talapkerdiń beınejazbalaryn qaraıdy.
Buǵan deıin Bilim jáne ǵylym mınıstri UBT-ny tapsyrý rásiminiń ashyqtyǵyn qamtamasyz etýdi jáne testileý nátıjelerin baqylaýdy kúsheıtýdi tapsyrǵan bolatyn.
Baqylaý kúsheıgendikten, úsh jyl ishinde tyıym salynǵan zattardy kirgizý áreketteri birshama azaıdy. 2019 jyly 128 myń, 2020 jyly 1296 túlek UBT-ǵa tyıym salynǵan zattardy alyp ótýge tyryssa, bıyl 758 jaǵdaı tirkeldi. Testileý kezinde tyıym salynǵan zattardy paıdalanýǵa tyrysqandardyń sany 2019 jylǵy 2363-ten 2021 jyly 749-ǵa deıin azaıdy.
Ulttyq testileý ortalyǵynyń qyzmetkerleri aldymen 100-den joǵary bal jınaǵan testilenýshilerdiń beınejazbalaryn tekseredi. Máselen, talapkerlerdiń nátıjeleri naýryz jáne mamyr, maýsym aılaryndaǵy kórsetkishterinen aıtarlyqtaı joǵary bolýy múmkin.
«Biz túlekterimizdiń tek óz bilimine úmit artýyn qamtamasyz etý úshin osyndaı muqıat tekserý júrgizip jatyrmyz. Óıtkeni búgin test tapsyryp, erejeni buzǵan talapkerdiń erteń polısıa qyzmetkeri, dáriger, muǵalim nemese sýdıa retinde adal maman bolatynyna kepildik joq. Sondyqtan komısıa 19 talapkerdiń nátıjelerin joıýǵa sheshim qabyldady. Endi olar bilim berý granttaryn taǵaıyndaý konkýrsyna qatysa almaıdy. Biraq bul jaǵdaılar balalar tarapynan bolǵandyǵyn eskerip, olarǵa joǵary oqý oryndarynda aqyly negizde oqý múmkindigi beriledi. Jalpy, barlyq túlekter UBT-ny jylyna birneshe ret tapsyra alady. Bul testileýge daıyndalý barysynda oqýshylardyń kúızelisin azaıtady. Biz taǵy da barlyq talapkerlerdi akademıalyq adaldyqqa shaqyramyz. UBT-nyń barynsha ashyq jáne adal ótýi úshin budan ári de barlyq jaǵdaıdy jasaıtynymyzdy aıtqym keledi. Beınejazbalardy tekserýdi jalǵastyramyz. Buzýshylyqtar anyqtalǵan jaǵdaıda nátıjeler men tipti berilgen granttardyń da kúshi joıylady», – dep atap ótti QR BǴM Ulttyq testileý ortalyǵy dırektorynyń m.a. Naýjan Dıdarbekova.