Astanadaǵy jeke stomatologıa klınıkasynda 3 jastaǵy qyzdyń ólimine qatysty sot prosesi jalǵasyp jatyr. Marqumnyń ákesi sotta sóılep, dárigerlerdiń qyzdyń 18 tisin bir seansta emdeýge sheshim qabyldaǵanyn málimdedi, dep habarlaıdy Aqshamnews.kz tilshisi.
Qaıǵyly oqıǵa 2024 jylǵy 30 qazanda bolǵan. Ákesi Talǵat Qumarovtyń aıtýynsha, qyzy 3,5 saǵatqa sozylǵan narkozdan keıin oıanbaǵan. Prosedýra bastapqyda úsh saǵatqa josparlanǵan.
«Men dárigerden 18 tisti birden emes, aldymen toǵyzyn, qalǵanyn keıin emdeýge bola ma dep suradym. Biraq bizge bárin birden jasaý kerek dedi. Sedasıa bala aýrýhanadan shyqqannan jeti aı ótken soń jasaldy. Eger jaqynda, bir-eki aı buryn bolsa, mundaı uzaq narkozǵa kelisim bermes edik», – dedi ol.
Qyzdyń ókpesi pnevmonıadan keıin tolyq jazylmaǵany anyqtalǵan. Medısınalyq jáne farmasevtıkalyq baqylaý komıtetiniń saraptamasy klınıkanyń balanyń jaǵdaıyn durys baǵalamaǵanyn kórsetken.
İs boıynsha basty aıyptalýshy Dent Park Ohno klınıkasynyń anestezıology - Aıda Jumaǵalıeva. Al stomatolog sotqa qatyspaǵan. Tergeý QK-niń 317-baby 3-bóligi («Medısınalyq qyzmetkerdiń kásibı mindetin tıisinshe oryndamaýy, adam ólimine ákelýi») boıynsha júrgizilip jatyr.
Aıyptalýshyǵa tórt jylǵa deıin bas bostandyǵyn shekteý nemese aıyrý, sondaı-aq úsh jylǵa belgili laýazymdardy atqarýǵa tyıym salý jazasy qarastyrylǵan.
25 qarashada prokýror saraptama qorytyndylaryn oqyp, qujattardan birneshe zańbuzýshylyq anyqtalǵanyn málimdedi. Atap aıtqanda, stomatologıalyq kartanyń bolmaýy, kelisimniń durys rásimdelmeýi, konsýltasıa jazbalarynyń joǵy, vıdeomaterıaldardaǵy sáıkessizdikter, dıagnozdardyń naqty qoıylmaýy jáne keıbir qoldanylǵan preparattardyń tirkelmeýi kórsetilgen.