Búgin QR Densaýlyq saqtaý mınıstrliginde alqa otyrysy bastalar aldynda Astanada qyzmettik mindetin atqarý kezinde qaza tapqan 23 jastaǵy jedel járdem feldsheri Uldana Myrzýannyń rýhyna bir mınýt únsizdik jarıalandy, - dep habarlaıdy Aqshamnews.kz tilshisi mınıstrlikke silteme jasap.
Vedomstvo málimetinshe, búkil el boıynsha 100 myńnan astam medısınalyq qyzmetker jumys oryndarynda áriptesin eske alyp, qurmet kórsetti.
"Elimiz boıynsha 100 myńnan astam medısına qyzmetkeri óz jumys oryndarynda áriptesiniń jarqyn beınesin eske alyp, qurmet kórsetti. Ol shuǵyl jaǵdaıda adamdardyń ómirin qutqarý úshin óz ómirin qıǵan bolatyn"- delingen habarlamada.
Uldana Myrzýan qaıtys bolǵannan keıin joǵary memlekettik nagradaǵa usynyldy. Memleket basshysynyń Jarlyǵymen ol qyzmettik boryshyn úlgili atqarǵany, tótenshe jaǵdaıda kórsetken erligi men janqıarlyǵy úshin «Erligi úshin» medalimen marapattaldy.
Eske salaıyq, 8 qarashada Astanada Táýelsizdik dańǵylyndaǵy ǵımarattyń kirpish qaptamasynyń bir bóligi kondısıonermen birge qulap, bes adam zardap shekken. Olardyń qatarynda oqıǵa ornyna alǵashqy kómek kórsetý úshin kelgen jedel járdem feldsheri Uldana Myrzýan da boldy. Ol zardap shekkenderge kómektesip jatqan sátte ekinshi qabattan qulaǵan kondısıoner onyń ústine túsken.
Dárigerler 8 qarashadan bastap onyń ómiri úshin kúresti, alaıda alǵan jaraqattary saldarynan aýrýhanada kóz jumdy. Densaýlyq saqtaý mınıstri Aqmaral Álnazarova marqumnyń týystaryna kóńil aıtyp, Uldananyń sońǵy sátine deıin adamdardy qutqarýǵa tyrysqanyn atap ótti.