Bir aptada170 myńǵa jýyq qazaqstandyq zeınetaqy jınaǵyn baspanaǵa jumsaý úshin bankke ótinish bergen.
Bul jaıynda «Otbasy bank» AQ basqarma tóraǵasy Lázzat Ibragımova aıtty, dep habarlaıdy Almaty-akshamy.kz QazAqparatqa silteme jasap.
«Halyq únine qulaq asatyn memleket - rasynda bul shyndyq. Prezıdent Qasym-Jomart Toqaev Úkimetke zeınetaqy jınaqtarynyń jetkiliktilik shegin 2022 jyldyń 1 sáýirine deıin ulǵaıtpaýdy tapsyrdy. Birinshi kezekte bul 200 myńǵa jýyq salymshyǵa ózderiniń birjolǵy zeınetaqy tólemin paıdalaný boıynsha óz quqyqtaryn iske asyrýǵa múmkindik berdi. Sizderge 2 jeltoqsannan keıingi www.enpf-otbasy.kz platformasynda qabyldanǵan ótinishterdiń statısıkasyn kórseteıin. Ol dataǵa deıin biz shtattyq rejımde jumys jasadyq jáne kún saıyn 2 myńnan 2,5 myńǵa deıin ótinish qabyldadyq», - dep jazdy bank basshysy Facebook paraqshasynda.
Ótinishterdi qabyldaý statısıkasy: 3 jeltoqsan - 21 500, 4 jeltoqsan - 15 095, 5 jeltoqsan - 7 789, 6 jeltoqsan - 38 478, 7 jeltoqsan - 34 417, 8 jeltoqsan - 31 441, 9 jeltoqsan saǵat 18:30 - 20 699 ótinish jáne keshke deıin taǵy qabyldanady. Osylaısha, eńbekke qabiletti 170 myńǵa jýyq qazaqstandyq dál osylaısha bir aptanyń ishinde ótinish bergen.
«Eger eldegi otbasylyq ortasha koefısıent 3,8 bolsa, onda 640 myń otbasy múshesi ózderin ketip bara jatqan poıyzdyń sońǵy vagonyna sekirip minýge tyrysqandaı sezindi. Al endi sizder tynysh ári qolaıly rejımde, aqylǵa salynǵan sheshimder qabyldaı alatyn múmkindikke ıe boldyńyzdar. Ótinish berýshiniń qarajatty maqsatty paıdalanýyn rastaýǵa arnalǵan 45 jumys kúni bar. Eger aqsha búgin tússe, jeltoqsandaǵy merekelerdi eskere otyryp, 20 aqpanǵa deıingi ýaqyt bar degen sóz. Bul jańalyq búginde kóptegen otbasylarǵa qýanysh syılady. Al jaǵymdy jańalyqtar qataryndaǵy ekinshi jańalyq - birjolǵy zeınetaqy tólemderin paıdalaný qaǵıdalaryna ózgerister qabyldaý prosesi jyldamdatylady. Indýstrıa jáne ınfraqurylymdyq damý mınıstrligi buıryqty merziminen buryn jarıalaýdy josparlap otyr. Bizdiń klıentter úshin erejege engizilgen bul ózgerister jańa múmkindikter ashady. Biz óz klıentimizdi jaqsy kóremiz jáne olardy qashan da qoldaýǵa daıynbyz. Biz BZT qarajaty esebinen depozıtti toltyrý batyrmasyn 2021 jyldyń 16 jeltoqsanynda iske qosýǵa jáne tórt demalys kúni boıy arnaıy aǵymdaǵy shottar men depozıtterdi ashýǵa daıynbyz, biraq osy kúnge olardy bári ashyp úlgergen sıaqty. Biz jerlesterimiz merekelik dastarhan basynda noýtbýkty ashyp nemese úı kompúterinen júktep alyp, ózderiniń birjolǵy zeınetaqy tólemderin Otbasy banktegi depozıtterine aýdara alatyndaı tehnıkalyq qoldaýdy qamtamasyz etýge daıynbyz. Tek bir ótinish, barlyǵyn www.enpf-otbasy.kz platformasynda onlaın rejımde jasasańyzdar», - deıdi Lázzat Ibragımova.
Aıta keteıik, aqparattyq qaýipsizdik maqsatynda platforma tek qazaqstandyq IP mekenjaılarynan ǵana qoljetimdi jáne planshettik nemese stasıonarlyq kompúterlermen jumys isteýge eseptelgen.
«Eger siz bireýdiń platformaǵa kire almaǵandyǵy týraly ashýly postyn kórseńiz, bul avtordyń VPN arnalary arqyly túsiniksiz saıttarǵa kirip, sonyń kesirinen endi platformaǵa kire almaı otyrǵandyǵynyń belgisi ekenin túsinińizder. Ótinimderdi tez qaraý úshin fılıaldardyń qyzmetkerlerin qashyqtan qosýdy bastaımyz. Fotosýrette zeınetaqy qarajattarynyń máselesine múlde mán bermeıtin bir soltústik óńirdegi fılıal beınelengen. Taǵy da bir ótinish, bank bólimshelerine barmaýlaryńyzdy suraımyz, sebebi beıneqońyraý, mobıldi qosymsha, onlaın-servıs degen dúnıeler bar. Árıne, osy jerde de barlyq suraqtaryńyzdy qoıyp, jaýaptaryn ala alasyzdar», - dep túıindedi sózin «Otbasy bank» AQ basqarma tóraǵasy.