SCAT áýekompanıasynyń "Atyraý-Taraz" baǵytyndaǵy reısi ushyp kelgennen keıin Taraz qalasy áýejaıyndaǵy jelilik polısıa bólimshesiniń qyzmetkerleri akt boıynsha quqyq buzýshyny túsirip aldy, - dep habarlaıdy almaty-akshamy.kz Kóliktegi polısıa departamenti baspasóz qyzmetine silteme jasap.
Tekserý barysynda kólik polıseıleri Atyraý qalasynyń 15 jastaǵy turǵynyn anyqtady. Ol ushý kezinde ushaq salonynda elektrondy temeki shekken.
"Polısıa qyzmetkerleri kámeletke tolmaǵan jolaýshymen profılaktıkalyq áńgime júrgizdi. Saqshylar oǵan temeki shegýdiń, alkogóldi ishimdik ishýdiń jáne basqa da qaýipti psıhotroptyq zattardyń densaýlyqqa zıandylyǵy týraly aıtty. Sondaı-aq ushaq bortynda qaýipsizdik erejelerin saqtaý kerektigin túsindirdi. Budan bólek, qyzdyń zańdy ókiline qatysty QR ÁQBtK 127-babynyń 1-bóligimen, ıaǵnı kámeletke tolmaǵandy tárbıeleý jáne (nemese) oǵan bilim berý, onyń quqyqtary men múddelerin qorǵaý jónindegi mindetterdi oryndamaý boıynsha ákimshilik hattama toltyrylyp, 10 AEK (36 920 teńge) kóleminde ákimshilik aıyppul salyndy", - delingen KPD habarlamasynda.
Eske salaıyq, 2023 jyly Kóliktegi PD qyzmetkerleri túrli ákimshilik quqyq buzýshylyqtar jasaǵany úshin 45 962 azamatty, onyń ishinde, áýe kemesiniń bortynda temeki ónimderin tutynǵany úshin 213, kámeletke tolmaǵan adamdy tárbıeleý jónindegi mindetterdi oryndamaǵany úshin 70 tulǵany ákimshilik jaýapkershilikke tartty.