2023 jylǵy 15 aqpanda saǵat 8:28-de dıspecherlik qyzmetke №131 baǵyt boıynsha kele jatqan avtobýstyń órtenýi týraly aqparat kelip tústi. Tehnıkalyq aqaýlyqty anyqtaǵan júrgizýshi nusqaýlyqqa sáıkes barlyq jolaýshylardy eskertip, olardy aıaldama kesheninde dereý túsiredi.
Budan soń avtobýs tehnıkalyq aqaýlardy joıý úshin avtoparkke bet aldy. Ál-Farabı dańǵylymen ońtústik baǵytta kele jatqanda qozǵaltqysh bóliminen órt shyǵady. Júrgizýshi órt sóndirgishpen órtti sóndirý boıynsha jedel sharalar qabyldaıdy, alaıda biraz ýaqyttan keıin jarylys boldy. Saǵat 8:45-te oqıǵa ornyna kelgen TJD qyzmetkerleri órtti oqshaýlap, 8: 50-de órt oshaǵyn tolyǵymen joıdy. Basqarmanyń málimetinshe, jábirlenýshiler men zardap shekkender joq, qazir jergilikti jerde ýákiletti organdar jumys isteýde.
Aıta keterligi, órt normatıvtik paıdalaný merzimi aıaqtalyp qalǵan "LIAz" markaly avtobýsta bolǵan. Avtoparktiń tehnıkalyq jaı-kúıin josparly tekserý kezinde osy markaly avtobýstardyń tozýy joǵary ekeni anyqtaldy. Sondyqtan kórsetiletin kólik qyzmetteriniń sapasyn jáne jolaýshylardyń qaýipsizdigin arttyrý úshin avtopark eski kólikterdi aýystyrý úshin jańa jyljymaly birlikterdi satyp alýdy josparlady.
Jyljymaly sostavty jańartý maqsatynda Almaty qalasynyń ákimdigi jańa avtobýstar satyp alýda. 2023 jyly 300 jańa avtobýs satyp alý jáne 100 birlik troleıbýs jańartý josparlanǵan, jeke avtoparkter 150 birlik gaz avtobýsyn satyp alýda.
Almaty qalasynyń qalalyq mobıldilik basqarmasy