Qazaqstan halqy Assambleıasyna – 30 jyl
Qazaqstan – kópetnosty elderdiń ishindegi eń biregeı memleketterdiń biri. Bul jerde júzden asa ult pen ulys bir shańyraq astynda tatý-tátti ómir súrip keledi. Biz úshin halyqtar dostyǵy, ózara qurmet pen beıbit qatar ómir súrý – jaı uran emes, kúndelikti ómir saltymyzdyń negizi.
Elimizdegi kúrd halqy da osy ortaq úıdiń bir bólshegi. Bizdiń qaýymdastyq – «Barbang» – Qazaqstan táýelsizdigin jarıalaǵan alǵashqy jyldary qurylyp, el ishindegi turaqtylyqty, ultaralyq tatýlyqty saqtaýǵa belsene atsalysyp keledi. Biz qazaq halqyna árdaıym alǵysymyzdy bildiremiz – keń qushaǵyn ashyp, taǵdyr tálkegimen kelgen ózge ulttardy baýyryna basty, bir úzim nanyn bólisip, beıbit ómir syılady.
Halyqtar arasyndaǵy birlik – bul memlekettiń ishki turaqtylyǵy men damýynyń kepili. Biz muny ásirese qazirgi kúrdeli geosaıası jaǵdaıda tereń sezinip otyrmyz. Qazaqstan halqy Assambleıasy – birlik pen dostyqtyń naqty kepiline aınalǵan biregeı ınstıtýt. Ol mádenı ártúrlilikti saqtaý men azamattyq biregeılikti nyǵaıtýda mańyzdy ról atqaryp keledi.
Tarıh bizge bir nárseni úıretti: ulttyń ulylyǵyn onyń sany emes, berekesi men birligi anyqtaıdy. Sol sebepti biz – kúrdter, qazaq elimen taǵdyrlas, bir halyq retinde, beıbitshilik pen kelisimdi saqtaý jolynda eńbek etýdi qasıetti mindetimiz dep bilemiz. Óz mádenıetimizdi saqtaı otyryp, qazaq mádenıetin de qurmetteımiz, memlekettik tildi meńgerýdi – azamattyq paryzymyz dep sanaımyz.
Birlik bar jerde bereke bar. Qoǵam tynyshtyǵy – ár azamattyń amandyǵy, bolashaqtyń kepili. Al dostyq – sol birliktiń dińgegi.
Biz – ártúrli ult ókilderi, biraq bir Otanymyz bar – ol Qazaqstan. Bizdi biriktiretin – ortaq taǵdyr, ortaq bolashaq, ortaq qundylyqtar. Osy qundylyqtardy saqtaý – bárimizdiń boryshymyz.
Halyqtar arasyndaǵy dostyqty nyǵaıtý – búgingi kúnniń ǵana emes, keler urpaq aldyndaǵy da jaýapkershilik. Osy jaýapkershilikti adal atqarý – ár azamattyń mindeti dep esepteımin.