Aınalymǵa apıynnyń bir mıllıonnan astam bir rettik dozasy jiberilmedi, – dep habarlaıdy almaty-akshamy.kz Polisia.kz silteme jasap.
İİM esirtki qylmysyna qarsy is-qımyl departamenti Batys Qazaqstan oblysynyń polısıasymen jáne kóliktegi polısıamen birlesip, prokýratýranyń úılestirýimen quramynda kóknár sabany men apıynnyń qospalary bar taǵam kóknáriniń shetelden jetkizilý arnasynyń jolyn kesý boıynsha keń aýqymdy arnaıy operasıany aıaqtady.
– Arnaıy maqsattaǵy bólimshelerdiń qoldaýymen qurylǵan jedel-tergeý toptary Oral, Aqtóbe, Shymkent jáne Almaty qalalarynyń aýmaǵynda Almatyda apıyn kóknárin satyp alyp, ony elimizdiń batysynda satqan segiz adamdy ustady. Esirtki trafıgin Shymkent qalasynyń 50 jastaǵy turǵyny uıymdastyrǵan. Ol Aqtóbe men Oraldaǵy tórt dúkenniń ıesi bolyp shyqty. Sol arqyly kúdikti esirtki jasaýǵa arnalǵan kóknár sabany men ónerkásiptik eritkishti satqan. Polısıa bir mezgilde Astana, Almaty, Oral, Shymkent, Aqtóbe, Qostanaı, Kókshetaý, Rýdnyı qalalarynda 35 tintý is-sharasyn júrgizip, kúdiktilerdi ustady, – dedi QR İİM esirtki qylmysyna qarsy is-qımyl departamenti bastyǵynyń orynbasary Sarqytbaı Qusaıynov.
Oral qalasynda júrgizilgen tintý barysynda eki dúkende 13 qap keptirilgen kóknár sabany, eritkishi bar qoraptar, tarazylar, esirtki saýdasynan alynǵan aqsha aǵyndary tirkelgen kasalyq jýrnaldar tárkilendi.
Aqtóbede taǵy 68 qap kóknár sabany, eritkishi bar qaptamalar, kasalyq jýrnal jáne qylmyskerler esirtki tasymaldaıtyn Toyota Highlander jol talǵamaıtyn kóligi tárkilendi.
Shymkentte qylmystyq bıznesti uıymdastyrýshy ustaldy. Onyń úıinen esirtki saýdasynyń qarjy aǵyndary tirkelgen alty kasalyq jýrnal, bes qap keptirilgen kóknár sabany, Toyota Land Cruiser Prado 150 jol talǵamaıtyn avtokólik, sondaı-aq DAF aýyr júk kóligi tabyldy.
Almatyda qylmystyq top músheleriniń biri jalǵa alǵan qoıma úı-jaılaryna tintý júrgizildi. 22 tonnadan astam kóknár sabany, sondaı-aq BMW X5 avtokóligi tabylyp, tárkilendi.
Bir mezgilde kólik polısıasy Astana, Almaty, Qostanaı jáne Rýdnyı qalalarynda apıyn kóknárin satý boıynsha ortaq otbasylyq qylmystyq bıznesti jolǵa qoıǵan jeti fıgýrantty ustady.
– Júrgizilgen arnaıy operasıalar nátıjesinde qylmystyq toptyń 15 múshesi ustaldy. Olar 15 jyldan 25 jylǵa deıin bas bostandyǵynan aıyrylady. 104 tonnadan astam kóknár sabany, 600-den astam “tropıkamıd” jáne “mıdeks” dárilik preparattarynyń bótelkeleri, shamamen 5 mln teńge, 4 avtokólik jáne DAF aýyr júk kóligi tárkilendi. Bul rette bir rettik doza úshin 0,2 gram ekstraksıalyq apıyn jetkilikti ekenin atap ótken jón. Osylaısha aınalymǵa apıynnyń bir mıllıonnan astam bir rettik dozasy jiberilmedi. Tárkilengen ónimniń quny 4 mlrd teńgege baǵalanady, – dedi Sarqytbaı Qusaıynov.