Almatyda jyl basynan beri 800-den astam kásipker 100 mlrd teńge kóleminde memlekettik qoldaýǵa ıe boldy.
Bul týraly «Damu» qorynyń ókilderi málimdedi, dep habarlaıdy Almaty-akshamy.kz.
Jalpy elimizdegi shaǵyn, orta jáne iri kásipkerler osy ınstıtýt arqyly tórt baǵyt boıynsha memlekettik sýbsıdıa alyp otyr. Elimizde basym ekonomıkalyq baǵyt boıynsha jumys isteıtin kásipkerlerge kómek artyp keledi. Naqtyraq aıtsaq, aýylsharýashylyq sektory, óndiris, týrızm, densaýlyq saqtaý, bilim berý jáne qyzmet kórsetý salasyndaǵy kásiperlerge 3 mlrd teńgege deıin sýbsıdıa beriledi. Mysaly, Almaty mańyndaǵy myna jylyjaı qyzanyq, qıar, baıaldy ósirýmen aınalysady. Jýyrda 2 mlrd teńge jeńildetilgen nesıe alypty. Ol aqshaǵa óndiristi keńeıtip, lımon ósirýdi josparlap otyr. Al qazir ósirilip otyrǵan kókónistiń deni ishki naryqta satylady.
Memlekettik qoldaýdyń taǵy bir joly-kepildik berý. Iaǵnı kásipkerler nesıe alǵan kezde kepilge qoıylatyn múlik quny jetpegen jaǵdaıda, qor qosymsha kómek beredi. Kepildendirý boıynsha 500-ge tarta kásipker 20 mlrd teńgege jýyq qoldaý tapqan.
Al shaǵyn óndirispen aınalysatyn azamattarǵa 20 mln teńgege deıin jeńildetilgen nesıe qarastyrylǵan. Ekonomıkalyq basym baǵyttar talabyna kirmeıtin kásiporyndarǵa da arnalǵan baǵdarlama bar. Almatyda tirkelgen jáne baǵdarlamaǵa saı emes kásipkerler de 6 paıyzben 100 mln teńgege deıin nesıe alýǵa bolady.
Jandos Nurǵazınov, Damu qorynyń fılıal basshysy:
- Memlekettiń basty maqsaty – mynaý kásipkerdiń nesıelik júgin azaıtý. Qazirgi ýaqytta 21,5 paıyzben nesıe alady. Sonyń 8 paıyzyn kásipker ózi tóleıdi. Qalǵan 13,5 paıyzyn memleket sýbsıdıalaý arqyly tólep beredi bes jyldyń ishinde.
Jalpy, Almaty qalasynda 2010 jyldan beri 15 myńnan astam kásipker memlekettik qoldaý alǵan. Bul qarajattyń maqsatty paıdalanýyn qor ókilderi baqylap otyrady. Osylaısha jumystaryn jolǵa qoıǵan kásiporyndar salyq tólep, el ekonomıkasynyń damýyna óz úlesterin qosyp otyr.