Elektrondy taýarlar katalogynda 308 myńnan astam taýar túri bar
Endi memlekettik satyp alýǵa tapsyrys berýshiler elde joq talapty qoıa almaıdy. 1 shildeden bastap taýarlardyń elektrondyq katalogy engiziledi. Tenderge qatysýshy kásipkerler sonda óz taýaryn tirkeýi kerek, dep habarlaıdy «Habar 24».
Tıisti joba barmaq basty kóz qysty áreketterge tosqaýyl qoıý úshin qolǵa alyndy. Ázirge bul tizimge keńse zattary, turmystyq taýarlar, dári-dármek jáne medısınalyq maqsattaǵy buıymdar, elektr taýarlary kirgen. Aldaǵy ýaqytta mamandar tizimdi keńeıtýdi josparlap otyr.
«Elektrondyq qarjy ortalyǵy» basqarma tóraǵasy Nurlybek Rahmetovtiń aıtýynsha, bul joba ádil básekelestikke yqpal etedi. Memlekettik satyp alýdy neǵurlym ashyq júrgizýge múmkindik beredi.
«Qazir elektrondy taýarlar katalogynda 308 myńnan astam taýar túri bar. 700 qoldanýshy tirkelgen. Eń basty eskeretin jaıt, qoldanýshylar úshin júıe tegin. Birinshi kezekte 1 shildege deıin sharýashylyq taýarlar men keńse zattaryn jáne medısınalyq buıymdar men dári-dármek túrlerin shyǵaratyndar tirkelýi qajet. Olarǵa KZTIN kody beriledi. Turmystyq elektr quraldary men kompúter óndirýshiler de qalys qalmaýy qajet. Bolashaqta taýar túrlerin 1mln deıin jetkizý josparlanýda»,-deıdi Nurlybek Rahmetov.