Bul shara sybaılas jemqorlyqqa qarsy jáne konkýrstyq rásimderdi ashyq ótkizýge baǵyttalǵan.
1 sáýirden bastap pedagogterdi mektepke jumysqa qabyldaý boıynsha jańa modýl iske qosylady, dep habarlaıdy almaty-akshamy.kz Oqý-aǵartý mınıstrliginiń baspasóz qyzmetine silteme jasap.
Sıfrlyq qyzmet Ulttyq bilim berý derekter qoryna engizildi. Bul shara sybaılas jemqorlyqqa qarsy jáne konkýrstyq rásimderdi ashyq ótkizýge baǵyttalǵan.
Sondaı-aq pedagogterdi atestattaýda qujattardy tapsyrý boıynsha da avtomattandyrý engizilip jatyr. Endi pedagogterdiń barlyq málimeti "Pedagog portfolıosy" modýlinde jınaqtalady. Munda pedagog týraly, onyń bilimi, densaýlyq jaǵdaıy, jumys tájirıbesi, quqyq buzýshylyqtar, atestattaýdan ótý, marapattary jáne tálimgerlik pen sıfrlyq qujattar týraly elektrondyq aqparat saqtalady.
"Ashyqtyq pen eseptiliktiń bolýy sybaılas jemqorlyqqa qarsy kúreste basty ról atqarady. Osy modýlderdi engize otyryp, pedagogterdi jumysqa qabyldaý kezinde qaǵaz júzindegi qujat aınalymyn jáne sybaılas jemqorlyq táýekelderin tolyq joıý josparlanyp otyr. Júıeni iske qosý aldynda basqarma, bólimder men bilim berý uıymdarynyń mamandary úshin oqytý uıymdastyryldy", – dedi Oqý-aǵartý mınıstrligi sıfrlandyrý departamenti dırektorynyń orynbasary Maıra Maralbaeva.
Buǵan deıin atalǵan modýl Shymkent qalasynda jáne Qaraǵandy oblysynyń Shahtınsk qalasynda synaqtan ótti. Sondaı-aq, jumys izdeý jáne qajet personaldy tańdaý boıynsha elimizdiń basqa óńirlerinde de Ulttyq bilim berý derekter qorynyń "Elektrondyq eńbek bırjasy" platformasymen ózara ıntegrasıasy josparlanǵan.