Eńbek jáne halyqty áleýmettik qorǵaý mınıstrligi 2026 jyly elimizde zeınetaqylar men járdemaqylar qansha paıyzǵa ósetinin málimdedi, dep habarlaıdy aqshamnews.kz
2026–2028 jyldarǵa arnalǵan respýblıkalyq búdjet týraly zańǵa sáıkes, 2026 jylǵy 1 qańtardan bastap Ulttyq bank aıqyndaıtyn boljamdy ınflásıa deńgeıine saı memlekettik járdemaqylardyń barlyq túri, bazalyq jáne yntymaqty zeınetaqylar 10%-ǵa ulǵaıtylady.
Sonymen qatar Memleket basshysynyń tapsyrmasyna sáıkes, 2023 jyldan bastap bes jyl boıy eń tómengi bazalyq zeınetaqy mólsherin kúnkóris deńgeıiniń 70%-yna deıin, al eń joǵary mólsherin 120%-yna deıin kezeń-kezeńimen jyl saıyn arttyrý júzege asyrylyp keledi.
Osylaısha, 2026 jylǵy 1 qańtardan bastap bazalyq zeınetaqynyń eń tómengi mólsheri 35 596 teńgeni (kúnkóris deńgeıiniń 70%-y) quraıdy. Al eń joǵary mólsheri kúnkóris deńgeıiniń 110%-ynan 118%-yna deıin ósip, 60 005 teńgege jetedi.
Máselen, 2019 jyly zeınetke shyqqan 70 jastaǵy zeınetkerge 2025 jyly búdjetten tólengen zeınetaqy mólsheri 171 588 teńge boldy, onyń ishinde bazalyq zeınetaqy tólemi – 50 851 teńge, yntymaqty zeınetaqy – 120 737 teńge.
2026 jylǵy 1 qańtardan bastap bolatyn ósimdi eskergende, bul zeınetkerdiń jalpy zeınetaqysy 192 816 teńgege deıin ulǵaıady, onyń ishinde bazalyq zeınetaqy – 60 005 teńge, yntymaqty zeınetaqy – 132 811 teńge bolady. Aıta ketý kerek, kórsetilgen somalarǵa Biryńǵaı jınaqtaýshy zeınetaqy qorynan (BJZQ) tólenetin tólemder kirmeıdi.
2026 jylǵy 1 qańtardan bastap memlekettik járdemaqylar mólsheriniń ósýine qatysty birneshe mysal:
1, 2, 3-bala dúnıege kelgende tólenetin járdemaqy 149 416 teńgeden 164 350 teńgege deıin, al 4 jáne odan da kóp bala týǵan jaǵdaıda – 247 716 teńgeden 272 475 teńgege deıin ulǵaıady.
Balalar sanyna baılanysty belgilenetin kópbalaly otbasylarǵa arnalǵan járdemaqy 4 balasy bar otbasylar úshin 63 030 teńgeden 69 330 teńgege deıin, al 10 balasy bar otbasylar úshin 157 280 teńgeden 173 000 teńgege deıin ósedi.
I toptaǵy múgedektigi bar adamdarǵa arnalǵan járdemaqy 101 702 teńgeden 111 872 teńgege deıin, II top úshin – 81 362 teńgeden 89 498 teńgege deıin, III top úshin – 55 474 teńgeden 61 021 teńgege deıin arttyrylady.
Sondaı-aq Memlekettik áleýmettik saqtandyrý qorynan (MÁSQ) asyraýshysynan aıyrylý jáne eńbekke qabilettiliginen aıyrylý jaǵdaılary boıynsha tólenetin áleýmettik tólemder de 10%-ǵa kóbeıtiledi. Bul tólemder memlekettik búdjetten beriletin járdemaqylarǵa qosymsha túrde, mindetti áleýmettik saqtandyrý júıesine qatysýshylarǵa tólenedi.
Tólemderdiń mólsheri ár adam úshin jeke esepteledi jáne sońǵy eki jylda MÁSQ-qa áleýmettik aýdarymdar júrgizilgen ortasha aılyq tabysqa, eńbekke qabilettiliginen aıyrylý koefısıentterine, asyraýyndaǵy adamdar sanyna, mindetti áleýmettik saqtandyrý júıesine qatysý ótiline jáne tabysty almastyrý deńgeıine baılanysty bolady.