2025 jyldyń 1 qańtarynan bastap Birikken Arab Ámirlikterinde nekege turý aldynda genetıkalyq test tapsyrý barlyq azamattar úshin mindetti rásimge aınaldy.
Bul sheshim elde genetıkalyq aýrýlardyń keń taralýyna baılanysty qabyldandy, dep habarlaıdy aqshamnews.kz.
Mundaı jaǵdaı aımaqtyń tarıhı jáne mádenı erekshelikterimen baılanysty. Buryn nekege turýǵa nıet bildirgen azamattardan tek medısınalyq tekserý talap etiletin, al genetıkalyq testileý erikti bolatyn. Endi bul prosedýra mindetti túrde azamattardyń bárine engizildi.
«Genetıkalyq testileý 570-ten astam genetıkalyq mýtasıany anyqtaýǵa múmkindik beredi. Olardyń ishinde júrek-qan tamyrlary aýrýlary, epılepsıa, bulshyqet atrofıasy, estý qabiletin joǵaltý, mýkovısıdoz jáne basqa da aýyr tuqym qýalaıtyn aýrýlar bar. Bul ádis otbasyn josparlaý kezinde bolashaq ata-analarǵa densaýlyq jaǵdaıyn eskere otyryp, durys sheshim qabyldaýǵa kómektesedi», — delingen materıalda.
Ámirlikterdiń Genomdyq keńesi bul sheshimdi qarasha aıynda ótken úkimettik jınalysta maquldady. Baǵdarlama ulttyq genetıkalyq derekter bazasyn qurýdy kózdeıdi. Bul el turǵyndarynyń arasynda genetıkalyq aýrýlardy erte anyqtaýǵa jáne der kezinde medısınalyq kómek kórsetýge múmkindik beredi.
2022 jyly Abý-Dabıde bastalǵan Emirati Genome Programme pılottyq jobasy aıasynda 800-den astam jup zertteýden ótti. Nátıjesinde, 86%-ynda genetıkalyq úılesimdilik rastaldy. Al 14%-ynda qosymsha medısınalyq sharalar men otbasy josparlaýdy qajet etti.
«Ámirlikterde jaqyn týystar arasynda nekelesýdiń joǵary deńgeıine baılanysty genetıkalyq buzylýlar keń taralǵan. Genetıkalyq táýekelderdi túsiný medısınalyq qyzmetterdiń sapasyn arttyryp, sozylmaly aýrýlardan bolatyn uzaqmerzimdi shyǵyndardy azaıtýǵa kómektesedi», — dep jazylǵan maqalada.
Barlyq nekege turýǵa nıetti juptar 2025 jyldan bastap mindetti genetıkalyq testileýden ótedi, al test nátıjelerin óńdeý shamamen 14 kúndi alady.