Magıstratýraǵa túsý úshin keshendi testileýge qatysýǵa ótinishter 1 maýsymnan 8 shildege deıin qabyldanady.
Tirkelý Ulttyq testileý ortalyǵynyń saıtynda júrgiziledi, testileý 20 shilde men 10 tamyz aralyǵynda ótedi, dep habarlaıdy Almaty-akshamy.kz.
Úmitkerler testileýden ótkisi keletin qalany ózderi tańdaı alady. Ótinishterdi qabyldaý merzimi aıaqtalǵanǵa deıin bilim berý baǵdarlamalarynyń toby, tili jáne testileýdi tapsyrý orny boıynsha ótinishke ózgerister engizý múmkindigi bar.
Ǵylymı-pedagogıkalyq magıstratýraǵa túsý úshin keshendi testileý elektrondyq formatta ótedi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Barlyǵyna 3 saǵat 55 mınýt beriledi. Shekti bal – 75 bal.
Shyǵarmashylyq mamandyqtar boıynsha beıindi magıstratýraǵa túsýshilerden qujattar qabyldaýdy 1 maýsym men 8 shilde aralyǵynda joǵary jáne (nemese) joǵary oqý ornynan keıingi bilim berý uıymdary júzege asyrady.
Bıyl beıindi magıstratýraǵa túsý erejelerine ózgerister engizildi. Endi beıindi magıstratýraǵa túsýge nıetti úmitkerler «Oqýǵa daıyndyǵyn anyqtaýǵa arnalǵan test» bóliminen bosatyldy. Osylaısha, olar tek bilim berý baǵdarlamalary tobynyń beıini boıynsha test tapsyrady. Shekti bal keminde 30 bal, onyń ishinde árbir beıindi pán boıynsha keminde 7 bal alý kerek.
«Sondaı-aq, basshy laýazymynda keminde bes jyl ótili bar nemese bilim berý baǵdarlamasynyń beıinine sáıkes mamandyǵy boıynsha keminde 10 jyl eńbek ótili bar tulǵalar beıindi magıstratýraǵa aqyly negizde áńgimelesý nátıjeleri boıynsha qabyldanady», - dedi Ǵylym jáne joǵary bilim mınıstrligi.
Keshendi testileý nátıjelerimen kelispegen jaǵdaıda túsýshiler testileý aıaqtalǵannan keıin onlaın apelásıaǵa bere alady.
Magıstratýraǵa túsýshiler 13 myńǵa jýyq bilim berý grantyna úmitker bola alady.