Memlekettik qyzmet isteri agenttiginiń tóraǵasy Darhan Jazyqbaı Prezıdenttik jastar kadr rezervine kezekti irikteýdiń erekshelikteri men kezeńderi týraly aıtty, dep habarlaıdy aqshamnews.kz
Agenttik tóraǵasy, Prezıdenttik jastar kadr rezervi – daryndy, bastamashyl, kásibı bilikti jastardy memlekettik basqarý júıesine tartýǵa baǵyttalǵan mańyzdy joba ekendigine nazar aýdardy. Memleket basshysy Prezıdenttik jastar kadr rezerviniń forýmynda atap ótkendeı, «elimizdegi bıznes, aýyl sharýashylyǵy, qarjy, medısına, bilim jáne basqa da sektorlarda tabysty eńbek etip júrgen adamdar jetkilikti. Naqty nátıjege umtylyp, tutynýshynyń qajettiligin óteý úshin jumys isteıtin osyndaı mamandardyń áleýetin jumyldyrý kerek».
Buǵan deıin 2019, 2021 jáne 2023 jyldary ótken irikteýlerge qatysýǵa jalpy 60 myńnan astam qazaqstandyqtar qyzyǵýshylyq tanytty. İrikteýler qorytyndysy boıynsha rezervke 400 adam qabyldandy. Búginde olardyń 318-i jaýapty qyzmetterge taǵaıyndalyp, ekonomıkanyń túrli salalarynda elimizdiń damýyna óz úlesterin qosýda.
Atap aıtqanda, 167 - ortalyq memlekettik organdarda, 37 -jergilikti atqarýshy organdarda, 62 - ulttyq kompanıalarda, 52 - ózge uıymdarda qyzmet atqarýda. Sondaı-aq 39 rezervshi saıası laýazymdarda, 3 - «A» korpýsynyń laýazymdarynda, 2 - Májilis depýtaty, 1 - máslıhat depýtaty bolyp qyzmet etýde.
Darhan Jazyqbaıdyń aıtýynsha, bıylǵy irikteýdiń basty ereksheligi – ár baǵyt boıynsha kandıdattardyń birkelki sanyn qamtamasyz etý maqsatynda árbir kezeńde proporsıonaldy irikteý ótkizý. Rezervtiń ár salalyq baǵyty boıynsha kvotalar qarastyrylyp, irikteý sol salalyq baǵyt boıynsha ǵana júrgiziletin bolady. Bul ádis salalar arasyndaǵy teńgerimdi qamtamasyz etip, naqty baǵyttar boıynsha úmitkerlerdi irikteýdi qamtamasyz etedi.
İrikteý memlekettik apparattyń salalyq kadrlarǵa qajettiligin eskere otyryp, ınfraqurylym, ónerkásip jáne saýda saıasaty, agroónerkásiptik keshen jáne qorshaǵan orta, syrtqy saıasat jáne ınvestısıalar; ekonomıkalyq jáne qarjylyq saıasat, sıfrlandyrý, áleýmettik saıasat jáne azamattyq qoǵam syndy 6 negizgi sala boıynsha júrgiziledi. Kandıdat tirkelý kezinde kórsetilgen salalyq baǵyttardyń birin tańdaýy qajet.
Úmitkerlerge qoıylatyn talaptar ózgerissiz qalady: irikteýge jasy 35-ten aspaǵan, joǵary bilimi jáne 5 jyl jalpy jumys tájirıbesi bar, memlekettik tildi V1 deńgeıinen tómen emes meńgergen Qazaqstan Respýblıkasynyń azamaty qatysa alady.
Prezıdenttik jastar kadr rezerviniń múshesi bolý úshin úmitkerler 6 kezeńnen turatyn keshendi irikteýden ótýi tıis.
Qujattardy qabyldaý – 1-30 maýsym aralyǵynda pkrezerv.gov.kz resmı platformasynda onlaın rejımde júzege asyrylady. İrikteýdiń obektıvtiligin qamtamasyz etý úshin kandıdattardyń derekteri jeke nómir berý arqyly jasyrylady. Baǵalaýshylar úshin úmitkerdiń kim ekendigi beımálim bolady.
Mátindik jáne sandyq aqparatpen jumys isteý qabiletin baǵalaý – testileý proktorıng júıesimen, aýdıo jáne beınefıksasıamen ótedi, ádildik pen ashyqtyq qamtamasyz etiledi. Talaptarǵa sáıkes keletin barlyq kandıdattar mátindik aqparatpen jumys isteý qabiletin baǵalaýdan ótedi. Bul rette sandyq testileýge ár salalyq baǵyt boıynsha eń kóp bal jınaǵan kandıdattardyń 50%-y jiberiledi.
Sıtýasıalyq tapsyrmalardy sheshý kezeńi – kandıdattardyń tańdaǵan salalyq baǵyttaryna baılanysty naqty problemalardy sheshý boıynsha usynystaryn baǵalaýǵa baǵyttalǵan. Bul kezeń onlaın-rejımde esse jazý formatynda ótedi.
Assessment-ortalyǵy men quzyretter boıynsha suhbat – oflaın formatta, Prezıdent janyndaǵy memlekettik basqarý akademıasynda ótetin bul kezeńde úmitkerler minez-qulyq ındıkatorlary jáne kásibı quzyretter boıynsha toptyq jáne jeke tapsyrmalardan ótedi. Onlaın formattaǵy jeke suhbat kásibı HR-menedjerlermen ótkiziledi.
Sarapshylyq komısıamen áńgimelesý – arnaıy komısıamen suhbattasý túrinde júzege asyrylady. Onyń qorytyndysy boıynsha Ulttyq komısıa otyrysyna 100-den aspaıtyn kandıdattar tizimi usynylady.
Ulttyq komısıanyń otyrysynyń qorytyndysymen úzdik 50 kandıdat Prezıdenttik jastar kadr rezervine qabyldanady.
İrikteýdiń ashyqtyǵy men ádildigin qamtamasyz etý maqsatynda kandıdattardy baǵalaý nátıjeleri olardyń jeke kabınetinde jáne kezeń qorytyndysy boıynsha aqparat resmı saıtta jarıalanady.
Agenttik tóraǵasy el múddesine qyzmet etemin degen belsendi jas azamattardy Prezıdenttik jastar kadr rezervine qatysýǵa shaqyrdy.
«Bilimdi, eńbekqor, otanǵa qyzmet etýdi paryz sanaıtyn jastar – elimizdiń turaqty damýynyń basty qozǵaýshy kúshi. Jastardyń bilimin, áleýeti men kúsh-jigerin el ıgiligi úshin tıimdi paıdalaný, qoǵamdyq múddelerge negizdelgen kásibı memlekettik qyzmetshilerdiń jańa býynyn qalyptastyrý – Agenttik jumysynyń basty baǵyttarynyń biri», - dedi Darhan Jazyqbaı.