Elimizde áýejaılar mańynda 1 200-den astam jer ýchaskesi zańsyz berilgen. Bul týraly Úkimet otyrysynda Indýstrıa jne ınfraqurylymdyq damý mınıstri Marat Qarabaev aıtty, dep habarlaıdy Almaty-akshamy.kz.
«Bas prokýratýranyń tekseris júrgizýi barysynda áýejaılardyń sanıtarlyq-qorǵaý aımaǵynyń shekarasynda jergilikti atqarýshy organdardyń 1 200-ge jýyq ýchaske bergeni anyqtaldy. Olarda 900-den astam ǵımarat salynǵan. Sondaı-aq, aerodrom mańyndaǵy aýmaqtarda, áýejaı komısıalarynyń kelisiminsiz 100 myńnan astam túrli obektilerdi salý faktileri bar. Zańsyz qurylys salý boıynsha neǵurlym kúrdeli jaǵdaı Almaty, Shymkent, Atyraý jáne Aqtóbe qalalarynda baıqalady», - dedi mınıstr.
Onyń atap ótýinshe, aerodrom mańy aýmaqtaryn paıdalaný boıynsha naqty talaptardy belgileý maqsatynda aerodrom aınalasynda ornalasqan jer ýchaskelerine quqyqtar berý tártibine túzetýler engizildi.
«Qazaqstannyń avıasıalyq ákimshiligine ushý qaýipsizdigine qater tóndiretin qyzmetterge ruqsat berý quzyreti berilgen. Jergilikti atqarýshy organdar tarapynan jer ýchaskelerin berý kezinde zańnama talaptaryn saqtaý jóninde pármendi is-sharalar qabyldaýy, sondaı-aq buryn turǵyzylǵan zańsyz qurylystar boıynsha tıisti is-sharalar atqarýy qajet», - dedi Marat Qarabaev.