Elde áýe qatynasyna suranys artyp keledi.
Ótken jyly otandyq kompanıalar 11 mln jolaýshyny tasymaldaǵan. Salada serpilis bar, biraq suranys kóbeıgen saıyn maman tapshylyǵy máselesi de sezilýde, dep habarlaıdy Almaty-akshamy.kz.
24.kz aqparatyna júginsek, sarapshylardyń aıtýynsha, Qazaqstanda bilikti ushqyshtar jetispeıdi. Sondyqtan otandyq áýe kompanıalary olardy amalsyz shetelden shaqyrýǵa májbúr. Alǵashqy 4 aıda otandyq áýe kompanıalary 4 mlnnan asa jolaýshy tasydy. Odan bólek byltyr elde 410 myń ushaqqa qyzmet kórsetildi. Bul 2021 jylmen salystyrǵanda 90%-ǵa artyq. Resmı statısıka áýedegi qozǵalystyń qarqyndy ósip jatqanyn kórsetedi. Alaıda naryqtaǵy suranysty bilikti otandyq mamandarmen qamtamasyz ete almaı otyrmyz. Qazir azamattyq avıasıa akademıasynda 1400 adam oqıdy. Jylyna 400 túlek bitiredi. Onyń 40-ǵy ushqysh. Biraq bul jetkiliksiz. Onyń ústine túlekterdiń biliktiligine de suraq kóp.
«Ushqyshtar salasynda kelsek, kishkene máseleler bar. Óıtkeni Eır Astanada Eýroodaqtyń dárejesindegi talap bar. Biz oǵan jetken joqpyz. Oǵan daıyndap jatyrmyz. Endi Eýropa Odaǵynyń talabyna saı keledi dep jatyrmyz. Biraq sertıfıkatymyzdy áli alǵan joqpyz. Bizdiń strategıamyz boıynsha 2025 jyly Eýropa Odaǵynyń sertıfıkatyn alýymyz kerek», - deıdi Azamattyq avıasıa akademıasynyń rektory Beken Seıdahmetov.
Elde ushqyshtardy daıyndaıtyn jalǵyz akademıa osy. Qazir mundaǵylar álemdegi úzdik oqý oryndaryna beriletin eýropalyq sertıfıkatty alýǵa daıyndalyp jatyr. Biraq akademıa áli de tehnıkalyq jabdyqqa zárý. Bilim ordasyna ushaqtan bastap, joǵarǵy standarttarǵa saı zamanaýı qurylǵylar qajet.
«Jetispeıtin tikushaqtar bar. 2015 jyldan bastap tikushaqtardy daıyndaý júrip jatyr. Tikushaq joq bolǵanan keıin jalǵa alamyz. Ushaqtardyń da jetispeýshiligi bar. Ózimizdiń ushaqtar bar, biraq ushqyshtardyń tkóptiginen biz ushaqtardy arendaǵa alýǵa májbúrmiz», - deıdi Azamattyq avıasıa akademıasynyń ushý jattyǵý, ushqyshtardy daıyndaý, ushý ortalyǵynyń dırektory Dáýlet Tóreahmetov.
Akademıadaǵy oqytýshylar men nusqaýshylardyń da biliktiligin arttyrý kerek. Qazir birqatary Eýropada oqyp jatyr. Maman tapshylyǵyn sheshýge áýe kompanıalarynyń ózderi de atsalysýda. Sonyń biri - Eır Astana kompanıasy. Olar azamattardy tolyq oqytyp, jumysqa qabyldap jatyr.
«Qazir álemdegi alpaýyt kompanıalarynyń basym bóliginde maman tapshy. Tıisinshe, bizde de defısıt bar. Ushqyshtardyń jetkilikti bolǵanymen, alda jańa áýe kemeleri qosylady. Sondyqtan sheteldegi bilikti mamandardyń kómegine júginemiz. Otandyq mamandardy daıarlaýǵa da atsalysyp jatyrmyz. Bizdiń arnaıy baǵdarlamamyz arqyly oqyp, qazir jumys istep júrgen qyzmetkerlerimiz bar», - deıdi áýe kompanıasynyń menedjeri İlıas Isabaev.
Sala mamandarynyń pikirinshe, máseleni sheshý úshin bilim berý isine ınvestısıa tartý kerek. Sonda kásibı ushqyshtar ǵana emes, tehnıkalyq mamandardy da kóbeıtýge múmkindik bolady. Maman tapshylyǵy álem boıynsha bar kórinedi.
«Álemde áýe qatynasyna suranys artyp otyr. Tıisinshe, maman tapshylyǵymen jahandaǵy kez kelgen áýe kompanıasy kezigip otyr. Biz bilim berý júıesine ınvestısıa tartýdy jedeldetýimiz kerek. Keı áýe kompanıalary ushqyshtardy ózderi oqytady. Bul tájirıbege de mán bergen jón. Salany serpiltýge memlekettiń qoldaýy da artyq etpeıdi», - deıdi Qazaqstannyń avıasıalyq ákimshiliginiń bas dırektory Katalın Radý.
Qazir eldegi avıasıa salasynda 20 myń adam jumys isteıdi. Jyldan-jylǵa maman tapshylyǵy máselesi kóbeıip keledi. Biraq naqty qaı mamandyqqa adam kerek, qaı baǵytta tapshylyq kóp ekeni zerttelmeıdi. Azamattyq avıasıa ókilderi qolda naqty statısıka bolsa, sol baǵytqa basymdyq berer edik deıdi.