Қазақстанда жаңартылатын энергия көздері қарқынды дамып келеді, алайда олардың тиімділігі желдің күші, ауа райы жағдайлары және күн сәулесінің қолжетімділігі сияқты факторларға байланысты өзгеріп отырады. Электр желісінің тұрақтылығын қамтамасыз ету үшін көмір және атом станциялары сияқты сенімді, тұрақты базалық көздер қажет.
Атом электр станциялары (АЭС) салу – электр энергиясының тапшылығын қысқартуға, тарифтердің өсуін тежеуге және экологияны жақсартуға мүмкіндік беретін сенімді шешімдердің бірі. Көмір станциялары экологияға және адам денсаулығына кері әсерін тигізетіндіктен, атом энергетикасы экологиялық тұрғыдан әлдеқайда тиімді болып табылады.
АЭС электр энергиясының құны мен өндіріс тұрақтылығы бойынша оңтайлы таңдау ретінде қарастырылады. Сонымен қатар, АЭС елдің энергетикалық тәуелсіздігін нығайтады, себебі ол отын импортына тәуелділікті азайтады. Бұл электр энергиясының бағасын бақылауда ұстауға көмектеседі және сыртқы факторларға тәуелділікті төмендетеді.
Ұзақ мерзімді перспективада АЭС пайдалану шығындары жаңартылатын энергия көздеріне қарағанда төмен болуы мүмкін. Себебі атом станциялары ұзақ уақыт бойы тұрақты мөлшерде электр энергиясын өндіреді, ал олардың жұмыс істеу мерзімі бірнеше онжылдыққа созылады. Осылайша, АЭС салу және пайдалану электр энергиясының тарифтерін тұрақтандыруға елеулі ықпал ете алады, бұл өз кезегінде тұтынушылар үшін ұзақ мерзімді тұрақты бағаны қамтамасыз етеді.
Қорыта айтқанда, АЭС Қазақстан үшін электр энергиясының қолжетімділігін арттырып қана қоймай, экологияны жақсартуға және елдің энергетикалық тәуелсіздігін нығайтуға мүмкіндік береді.
