«Алтын-Емел» ұлттық паркінде орнатылған фототұзаққа Қызыл кітапқа енген сирек жыртқыш – бүркіттердің (Aquila chrysaetos) су айдынында шомылып жүрген сәті түсіп қалды, деп хабарлайды Аqshamnews.kz тілшісі.
Бейнежазба ұлттық парктің Instagram-парақшасында жарияланып, желі қолданушыларының ерекше қызығушылығын тудырды. Кадрларда жыртқыш құстардың қорық аумағындағы жасанды су айдынына түсіп, қанатымен су шашып, шомылып жүргені анық көрінеді.
Ұлттық парк өкілдерінің айтуынша, бұл деректер жыртқыш құстардың мінез-құлқын зерттеуге ғана емес, оларды қорғау бойынша болашақ шараларды жоспарлауға да негіз болады.
«Алынған мәліметтер жыртқыш құстарды қорғау шараларын жетілдіруге, олардың мекендейтін ортасын сақтауға және антропогендік әсерді азайтуға бағытталған алдағы жұмыстардың негізі болмақ», – деп мәлімдеді парк әкімшілігі.,