Қалалық білім берудегі жаңа технологиялардың ғылыми-әдістемелік орталығы, №202 мектеп-гимназиясы және Жамбыл Жабаев әдеби-мемориалды музейінің бірлесуімен «Жамбыл Жабаев айтыстарының көркемдік-эстетикалық табиғаты» деген тақырыпта мұғалімдерге арналған қалалық семинар өтті.
Бұл басқосу мазмұнға да, мәнге де толы тағылымды шара болды. Айтыс өнерінің терең табиғатын талқылап қана қоймай, Жамбыл атамыздың бай мұрасын жаңа қырынан тануға мүмкіндік туды. Жамбыл ақынның немересі Салтанат Тезекбайқызы семинарға арнайы қонақ болып қатысты. Сондай-ақ аталған шараға Жамбыл Жабаев атындағы әдеби-мемориалды музей көшпелі көрмесімен келді. Семинар барысында №202 мектеп-гимназия мен Жамбыл Жабаев атындағы әдеби-мемориалды музей арасында өзара ынтымақтастық меморандумға қол қойылды.
Ұлы тұлғалардың мұрасын уақыт талабына сай заманауи форматта насихаттау – білім мен технологияның тоғысқан тұсы. Осы мақсатта ұстаздардың еңбегімен Жамбыл Жабаев музейінің виртуалды 3D нұсқасы әзірленді. Сонымен қатар, жобаны көпшілікке таныстыру үшін арнайы сайт ашылды. Бұл – Жамбыл әлемін жаңа тұрғыда танытып, жас ұрпаққа ұлы ақын өмірін цифрлы кеңістікте жеткізетін маңызды бастама.
Шараны ұйымдастырған №202 мектеп-гимназияның қазақ тілі мен әдебиеті пәні мұғалімдері Құралай Шериева, Назгүл Үркімбаева, Ғалия Елшібаева сынды ұстаздардың қажырлы еңбегі семинар мазмұнын байытып, Жамбыл мұрасын жаңа қырынан танытуға жол ашты.
Айта кетерлік жайт, бұл тағылымды басқосу жыр дүлдүлі Жамбыл Жабаевтың туғанына 180 жыл толуына орайластырылған іс-шаралардың бастамасы іспетті болды.