Қазақстанда Астана, Алматы және Шымкент қалаларында үш қоқыс жағу зауыты салынады, деп хабарлайды Aqshamnews.kz тілшісі.
Экология және табиғи ресурстар вице-министрі Жомарт Әлиевтің айтуынша, бұл нысандар қалдықтармен жұмыс істеу жүйесінің негізгі буынына айналып, сұрыптауға немесе басқа тәсілдермен қайта өңдеуге келмейтін қалдықтарды жоюға мүмкіндік береді. Жобаларға қытайлық серіктестермен бірлесіп 293 млрд теңге инвестиция қарастырылған, құрылыс мерзімі – екі жыл.
Вице-министр сондай-ақ қалдықтарды сұрыптау және қайта өңдеу инфрақұрылымы да қатар дамып жатқанын атап өтті. Өткен жылы утильалым есебінен іске қосылған жеңілдетілген қаржыландыру тетігі аясында «Жасыл даму» АҚ 60 жобаны мақұлдаған, оның 22-сі 89,4 млрд теңгеге қаржыландырылған. Бағдарламаның жалпы лимиті – 185 млрд теңге.
Мақұлданған бастамалардың қатарында:
-
92 жаңа қоқыс тасығыш көлік сатып алу;
-
қуаты жылына 2,3 млн тонна қалдықты құрайтын 19 сұрыптау кешенін іске қосу;
-
жылына 920 мың тоннаға дейін қалдықты қайта өңдеуге мүмкіндік беретін 33 жоба бар.
Ведомствоның бағалауынша, осы шаралар қалдықтарды қайта өңдеу үлесін 40%-ға дейін жеткізуге мүмкіндік береді.