Қостанайда "мектепте бомба бар" деген жалған хабар таратқан оқушы анықталды, деп хабарлайды Аqshamnews.kz тілшісі Polisia.kz-ке сілтеме жасап.
Полицияға белгісіз адам қала мектептерінің біріне жарылғыш зат қойылғаны туралы хабар берген. Қоңыраудан кейін байланыс бірден үзілген. Оқиға орнына дереу полицейлер, жарылғыш заттарды залалсыздандыру қызметі, өрт сөндірушілер және медицина қызметкерлері жетіп, мектеп оқушылары мен қызметкерлері шұғыл эвакуацияланды.
Ғимарат пен аумақты толық тексеру барысында ешқандай қауіпті зат табылған жоқ. Тексеру нәтижесінде жалған хабарды басқа мектептің 7-сынып оқушысы жасағаны анықталды. Ол сыныптасының телефонын пайдаланып, мұны “әзіл үшін” жасағанын және салдарын түсінбегенін мойындады.
Жасөспірім қылмыстық жауапкершілік жасына толмағандықтан, терроризм актісі туралы көрінеу жалған хабар беру фактісі бойынша қозғалған қылмыстық іс тоқтатылды. Алайда баланың ата-анасы оны дұрыс тәрбиелемегені үшін әкімшілік жауапкершілікке тартылды. Сонымен қатар, оқиғаға байланысты жедел қызметтердің шығындарын өндіру мәселесі қарастырылмақ.
Полиция терроризм актісі туралы жалған хабар бергені үшін бес жылға дейін бас бостандығынан айыру жазасы қарастырылғанын еске салып, ата-аналарды балалармен қауіпсіздік, жалған қоңыраулардың салдары және телефон мен әлеуметтік желілерді дұрыс пайдалану туралы әңгімелесуге шақырды.
