Жарма ауданының (Абай облысы) соты элиталық эскорт желісін ұйымдастырғаны үшін сотталған блогер Айка Мырзахметоваға жаза өтеуді екі жылға шегеруге шешім қабылдады, деп хабарлайды Аqshamnews.kz тілшісі.
Соттың мәліметінше, Мырзахметова 2024 жылдың 21 мамырында ҚК-нің 296-бабы 4-тармағы және 309-бабы 2-бөлігінің 1-тармағы бойынша 6 жыл 6 айға бас бостандығынан айырылған. Ол жазасын орташа қауіпсіздік деңгейіндегі түзету мекемесінде өтеуге тиісті болған.
Заңға енгізілген өзгерістерден кейін сотталушы тарапынан жаза өтеуді шегеру туралы өтініш беріліп, оны сот қарады. Сот Мырзахметованың 2020 жылы туған жас баласы бар екенін, оң мінездеме алғанын, жеңілдетілген режимде отырғанын, орындауға қатысты берешегі жоқ екенін ескеріп, ҚК-нің 74-бабына сәйкес өтінішті қанағаттандырды. Жазаның өтелмеген бөлігі екі жылға шегерілді.
Сот шешіміне сәйкес, бұл кезеңде Мырзахметованың мінез-құлқын пробация қызметі қадағалайды.
Еске салайық, 2024 жылдың мамырында Алматыда атышулы «Айканың тізімімен» танылған блогерге 6 жыл 6 айға бас бостандығынан айыру жазасы тағайындалған еді.
