Қарағандының «Шахтёр» клубы ресми түрде Freedom Holding Corp компаниясының меншігіне өтті, деп хабарлайды Аqshamnews.kz тілшісі. Холдинг басшысы – қазақстандық кәсіпкер Тимур Турлов.
Жаңа иелер Қарағанды облысында футболдың толыққанды экожүйесін құруды жоспарлап отыр. Жобаға жалпы 18,5 млрд теңге бөлінеді: оның 12 млрд теңгесі жаңа футбол академиясының құрылысына, 6,5 млрд теңгесі бұқаралық және жастар футболын дамытуға бағытталады.
Қарағанды облыстық футбол қауымдастығының президенті Тимур Турловтың қолдауымен бірнеше бастама іске асып жатыр:
-
«АЛҒА!» мектеп жобасы – 2029 жылға дейін 40 мыңнан астам оқушы мен 3600 студентті қамту, 100-ден астам мектепте футбол бағдарламасын енгізу;
-
Freedom BFL ресми жастар лигасы;
-
«Шахтёр» футбол академиясының құрылысы;
-
өңірлік футболды кешенді дамыту стратегиясы.
Жаңа академия шамамен 10 гектар аумақта салынып, жыл бойы жұмыс істейтін жабық арена, толық өлшемді жаттығу алаңы, екі қабатты әкімшілік-тұрмыстық кешен, медицина орталығы, бассейн, сауна, асхана және студенттерге арналған жатақханадан тұрады.
Сонымен қатар жаттықтырушыларды даярлауға ерекше мән беріліп, оларға халықаралық тәжірибе алмасуға және УЕФА лицензияларын алуға мүмкіндік жасалады. Футбол инфрақұрылымы қалада ғана емес, ауылдық елді мекендерде де дамытылады.
