بىلتىر موبيلدىك ينتەرنەت ساپاسىنا قاتىستى 532 شاعىم تۇسكەن
سيفرلىق دامۋ، يننوۆاسيا جانە اەروعارىش ونەركاسىبى ۆيسە-مينيسترى اسحات ورازبەك اۋىل ايماقتارداعى ينتەرنەت ساپاسىنىڭ نە سەبەپتى تومەن ەكەنىن ءتۇسىندىردى، - دەپ حابارلايدى Almaty-akshamy.kz BAQ.KZ-كە سىلتەمە جاساپ.
«بىلتىر موبيلدىك ينتەرنەت ساپاسىنا قاتىستى 532 شاعىم ءتۇستى. ال ءبىزدىڭ ەلدە 26 ملن ءتۇرلى سمارتفون، بىرنەشە كومپيۋتەرى بار جەلى قولدانۋشىلارى بار. ستاتيستيكاعا قاراپ، ينتەرنەت ساپاسىنا قاتىستى 532 شاعىمنىڭ از ەكەنىن كورەمىز. جالپى، شاعىم بارلىق ايماقتا بار. ءبىز ءبىرقاتار ءوڭىردىڭ گەوگرافيالىق ورنالاسۋىنىڭ كۇردەلى ەكەندىگىن ءتۇسىنۋىمىز قاجەت. ونداي وڭىرلەر – قاراعاندى، ۇلىتاۋ وبلىستارى، قوستاناي، شىعىس قازاقستان، تۇركىستان وبلىستارىنىڭ كەي جەرلەرى. جەر بەدەرى كۇردەلى بولعان كەزدە وپەراتورلارعا ينتەرنەتتىڭ قولدانىستاعى تەحنولوگيالارىن جەتكىزۋ وتە قيىن. سوندىقتان ول جەرلەرگە ينتەرنەت سپۋتنيك ارقىلى بەرىلەدى»، - دەدى سيفرلىق دامۋ، يننوۆاسيا جانە اەروعارىش ونەركاسىبى ۆيسە-مينيسترى.
ۆيسە-مينيستردىڭ ايتۋىنشا، سپۋتنيكتەن بەرىلگەن ينتەرنەتتىڭ ساپاسى تومەن بولادى.
«بۇگىندە مۇنداي مىڭنان استام لوكاسيا بار. بۇل لوكاسيالاردا نەگەوستانسيونارلى سپۋتنيكتىك تەحنولوگيانى پايدالانۋ ارقىلى قامتي الامىز. بۇل تەحنولوگيانىڭ ترافيك ساپاسى ءبىرشاما جاقسى. جالپى، ول تۇرعىنى 200 ادامنان اسپايتىن شاعىن ەلدى مەكەندەردى ساپاسى جاقسى ينتەرنەتپەن قامتۋ ءۇشىن جەتكىلىكتى»، - دەدى اسحات ورازبەك.