ۆەنەسۋەلا بيلىگى "ءبىرشاما" تۇتقىندى بوساتقانىن مالىمدەدى. ولاردىڭ قاتارىندا وپپوزيسيا وكىلدەرى مەن شەتەل ازاماتتارى دا بار، الايدا ناقتى ءتىزىم ازىرگە جاريالانعان جوق، دەپ حابارلايدى Aqshamnews.kz ءتىلشىسى.
يسپانيا تاراپى ءوز ەلىنىڭ بەس ازاماتى بوستاندىققا شىققانىن راستادى. ب ا ق مالىمەتىنشە، تۇرمەدەن بۇرىنعى پرەزيدەنتتىككە كانديدات ەنريكە ماركەس پەن ماريا كورينا ماچادونىڭ جاقتاسى بيادجو پيلەري دە بوساتىلعان.
ۇكىمەت مالىمدەمەسىندە بوساتىلاتىندار تىزىمىنە رەجيمنىڭ بەلگىلى قارسىلاستارى ەنگىزىلگەنى ايتىلدى. ولاردىڭ ىشىندە ساياساتكەر حۋان پابلو گۋانيپا مەن قۇقىق قورعاۋشى روسيو سان-ميگەل بار. سونداي-اق ءبىرقاتار اقپارات قۇرالدارى وپپوزيسيا مەن حالىقارالىق باقىلاۋشىلاردىڭ پىكىرىنشە، ۆەنەسۋەلادا وتكەن سوڭعى پرەزيدەنت سايلاۋىندا ءىس جۇزىندە جەڭىسكە جەتكەن ەدمۋندو گونسالەس ءۋررۋتييدىڭ كۇيەۋ بالاسى رافاەل تۋدارەستىڭ دە بوساتىلۋى مۇمكىن ەكەنىن جازدى.
اقش اكىمشىلىگىنىڭ حالىقارالىق ىستەر جونىندەگى باسپا ءسوز حاتشىسى اننا كەللي بۇل جاعدايعا قاتىستى پىكىر ءبىلدىرىپ، ۆەنەسۋەلادا ساياسي تۇتقىنداردى بوساتۋ «"پرەزيدەنتتىڭ ىقپالىن بارىنشا پايدالانىپ، امەريكالىق جانە ۆەنەسۋەلالىق حالىققا قاتىستى دۇرىس قادام جاساۋىنا مىسال" ەكەنىن ايتتى.
Foro Penal قۇقىق قورعاۋ ۇيىمىنىڭ دەرەگىنشە، ەلدە قاماۋدا وتىرعان ساياسي تۇتقىندار سانى شامامەن 800-گە جۋىق. ولاردىڭ ەداۋىر بولىگى نيكولاس مادۋرونىڭ 2024 جىلى قايتا سايلانۋىنا قارسى نارازىلىقتاردان كەيىن ۇستالعان. حالىقارالىق قۇرىلىمدار ۆەنەسۋەلادا ادام قۇقىقتارىنىڭ ورەسكەل بۇزىلۋىن ءجيى تىركەپ كەلەدى.
قۇقىق قورعاۋشى مارتا تينەونىڭ ايتۋىنشا، تۇتقىندار "گەليكويد" (El Helicoide) ورتالىعىنان دا بوساتىلىپ جاتىر. بۇل مەكەمە قاتاڭ ۇستاۋ جاعدايلارىمەن جانە بيلىككە قارسى وپپونەنتتەرگە قاتىستى ازاپتاۋ تۋرالى حابارلامالارىمەن بەلگىلى.