تۇركىستان وبلىسىندا قارت اكەسىن سوققىعا جىقتى دەپ ايىپتالعان ەر ادامعا قاتىستى سوت پروسەسى باستالدى، دەپ حابارلايدى اqshamnews.kz ءتىلشىسى.
ايىپتالۋشى قوسسەيىت اۋىلىنىڭ 41 جاستاعى تۇرعىنى الماس ساداقبايەۆ. وعان دارمەنسىز كۇيدەگى اكەسىن ازاپتادى جانە دەنساۋلىعىنا قاساقانا ورتاشا اۋىرلىقتاعى زيان كەلتىردى دەگەن ايىپ تاعىلىپ وتىر.
ءىس جەتىساي اۋداندىق سوتىندا قارالىپ جاتىر. بۇگىنگى وتىرىستا كۋاگەرلەر جاۋاپ بەردى. ولاردىڭ ايتۋىنشا، قارياعا كورسەتىلگەن قورلىق تۇسىرىلگەن ۆيدەو الدىمەن جەرگىلىكتى چاتتاردا تاراعان.
كۋاگەر رەتىندە اۋىلدىق امبۋلاتوريا دارىگەرى گۇلجان چۋكمانوۆا سوتتا مالىمدەمە جاساپ، چاتتاعى ۆيدەونى كورگەننەن كەيىن قوسسەيىت اۋىلدىق وكرۋگىنىڭ اكىمى نۇربول جاينارعا حابارلاسقانىن ايتتى. ول اكىمنەن قاريانىڭ جاعدايىن بارىپ كورۋدى جانە ايىپتالۋشىمەن سويلەسۋدى سۇراعان.
اكىم نۇربول جايناردىڭ ايتۋىنشا، ول ۇيگە بارعان كەزدە اقساقال توسەكتە جاتقان، الايدا كۇتىمى جاقسى بولعان. سونداي-اق اكىم ۆيدەونى ايىپتالۋشىنىڭ اكەسى قايتىس بولعاننان كەيىن عانا كورگەنىن جەتكىزدى. ول ساداقبايەۆتى اڭگىمەگە شاقىرىپ، كەزدەسۋگە ۋچاسكەلىك پوليسيا قىزمەتكەرىن دە قاتىستىرعان.
الماس ساداقبايەۆ وزىنە تاعىلعان ايىپتى مويىنداماي، اكەسىنە قورلىق كورسەتكەنىن جوققا شىعارعان. ول قارتتىڭ جاعدايى وتە اۋىر بولعانىن جانە كۇتىم جاساۋدىڭ قيىنعا سوققانىن العا تارتقان. مالىمەت بويىنشا، قاريا 2 قىركۇيەكتە كوز جۇمعان. جەرگىلىكتى دارىگەرلەر ءولىم تابيعي سەبەپتەردەن بولعانى جونىندە انىقتاما بەرىپ، مارقۇم جەرلەنگەن.
الايدا قىلمىستىق ءىس قوزعالعاننان كەيىن تەرگەۋ بارىسىندا ءمايىت ەكسگۋماسيالانعان.
ەسكە سالايىق، 2025 جىلدىڭ قىركۇيەگىندە تۇركىستان وبلىسىندا ەر ادامنىڭ ءوز اكەسىن بالاعاتتاپ، قورلاپ، ۇرىپ-سوققان ۆيدەوسى الەۋمەتتىك جەلىدە تاراعان ەدى. وسىدان كەيىن پوليسيا كۇدىكتىنى قاماۋعا الىپ، وعان ەكى باپ بويىنشا ايىپ تاققان.