7 مىڭ اتا-انا بالاسىنا ۆاكسينا سالدىرۋدان باس تارتتى.
قازاقستاندا بالاسىنا ۆاكسينا سالدىرۋدان باس تارتاتىن اتا-انالاردىڭ سانى جىل سايىن ارتىپ كەلەدى، دەپ حابارلايدى aqshamnews.kz
2025 جىلدىڭ العاشقى توقسانىندا عانا 7 مىڭعا جۋىق اتا-انا ەكپەدەن باس تارتقان. بۇل تۋرالى ق ر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ ۆاكسينامەن باسقارىلاتىن ينفەكسيالاردى باقىلاۋ باسقارماسىنىڭ باسشىسى نۇرشاي ازىمبايەۆا مالىمدەدى.
ونىڭ ايتۋىنشا، سوڭعى جىلدارى ەلىمىزدە، الەمنىڭ كوپتەگەن ەلدەرى سياقتى، قىزىلشا مەن كوكجوتەل اۋرۋلارى كوبەيىپ كەلەدى. بۇل جاعداي، اسىرەسە، جوسپارلى ەكپە الماعان بالالار اراسىندا ءجيى تىركەلۋدە.
"قىزىلشا جۇقتىرعانداردىڭ 75 پايىزدان استامى، كوكجوتەلگە شالدىققانداردىڭ 87 پايىزى – ۆاكسينا سالدىرماعاندار. بۇل دەرەكتەر يممۋنداۋدىڭ ينفەكسيانىڭ الدىن الۋداعى ماڭىزىن ايقىن كورسەتىپ وتىر. دەگەنمەن، ۆاكسينالاۋدان باس تارتۋشىلاردىڭ سانى وسۋدە. جىل باسىنان بەرى 7 مىڭ اتا-انا ەكپەدەن باس تارتقان"، – دەدى نۇرشاي ازىمبايەۆا.
ماماننىڭ سوزىنشە، مۇنداي ءۇردىس ەلدەگى ەپيدەميولوگيالىق احۋالعا، اسىرەسە، قىزىلشا مەن كوكجوتەل بويىنشا، تىكەلەي اسەر ەتىپ وتىر. سوندىقتان يممۋنداۋدىڭ ماڭىزدىلىعىن ءتۇسىندىرۋ شارالارى جالعاسىن تابۋى ءتيىس.