تۇركى مادەنيەتى جانە مۇراسى قورى ۇلىتاۋ وبلىسى اكىمدىگىمەن بىرلەسە قازاقستان رەسپۋبليكاسىنىڭ ۇلىتاۋ وبلىسىندا 2025 جىلدىڭ 27-28 قىركۇيەك كۇندەرى “جوشى حان جانە التىن وردا: تاريح، مۇرا جانە ۇلى دالا وركەنيەتى تاقىرىبىنداعى حالىقارالىق عىلىمي-تانىمدىق كونفەرەنسياسىن وتكىزدى.
كونفەرەنسيانىڭ ماقساتى – جوشى حان مۇراسىن جانە التىن وردا تاريحىن عىلىمي تۇرعىدان زەردەلەۋ، تاريح، رەستاۆراسيا، فولكلور، مۋزىكاتانۋ، ونەرتانۋ باعىتتارىنداعى عىلىمي-زەرتتەۋ جۇمىستارىن كەشەندى تۇردە جۇرگىزۋ، ۇلىتاۋ ءوڭىرى مادەنيەتىندەگى تۇركى تانىمىنا ورتاق قۇندىلىقتاردى ايشىقتاۋ، تۇتاس تۇركى وركەنيەتىنىڭ رۋحاني قازىناسى رەتىندە باعالاۋ جانە قازىرگى قوعامداعى ءمانىن ايقىنداۋ.
“التىن وردا جانە جوشى ۇلىسى كەزەڭىندەگى مەملەكەتتىلىك پەن تاريحي-مادەني پروسەستەر” جانە “ءحىىى-XIV عاسىرلارداعى تۇركى الەمىنىڭ مۋزىكالىق-فولكلورلىق مۇراسى مەن رۋحاني قۇندىلىقتارى. كۇيشى-سازگەر كەتبۇقا ءبيدىڭ تاريحي-مادەني مۇراسى” تاقىرىپتارىن قامتىعان اۋقىمدى ءىس-شاراعا ازەربايجان، قازاقستان، قىرعىزستان، تۇركيا، وزبەكستان، تاتارستان ەلدەرىنەن كەلگەن تاريحشى، فيلولوگ، فولكلورتانۋشى عالىمدارى قاتىستى.
كونفەرەنسيانىڭ پلەنارلىق وتىرىسىندا تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا، ۇلىتاۋ وبلىسىنىڭ اكىمى داستان رىسپەكوۆ، قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ مادەنيەت كوميتەتى ءتوراعاسىنىڭ ورىنباسارى ماقسات ارعىنبەكوۆ ءسوز سويلەدى. اقتوتى رايىمقۇلوۆا كونفەرەنسيا قاتىسۋشىلارىنا العىسىن ءبىلدىرىپ، ءوز سوزىندە جوشى حان مۇراسى مەن التىن وردا تاريحىن تەرەڭىنەن زەردەلەنىپ، ۇلىتاۋ توپىراعىنداعى تامىر جايعان تۇركىلىك ورتاق قۇندىلىقتاردى ايقىنداۋ بۇگىنگى كۇننىڭ باستى ماسەلەلەرىنىڭ ءبىرى ەكەندىگىنە باسا نازار اۋداردى.
سونداي-اق، ءىس-شارا اياسىندا تۇركى حالىقتارىنىڭ رۋحاني قۇندىلىقتارىن ۇلىقتاعان تۇركى مادەنيەتىنىڭ امباسسادورىاتانعان “TURAN” ءانسامبلىنىڭ “TAMYR” اتتى كونسەرتى وتكىزىلدى. كونسەرتكە جينالعان كورەرمەن تۇركى الەمىنىڭ 40-تان اسا ۇلتتىق اسپاپتارىنىڭ ۇنىمەن تانىسىپ، حالىق شىعارمالارىنىڭ اۋەزدى اۋەنىنە بولەندى.
سونىمەن قاتار، جوبا اياسىندا كونفەرەنسيا قاتىسۋشىلارىنا جوشى حان، الاشا حان، دومباۋىل كەسەنەلەرى سياقتى ۇلىتاۋ ءوڭىرىنىڭ كۇللى تۇركى جۇرتىنا ورتاق تاريحي-مادەني ورىندارىنا ساياحات ۇيىمداستىرىلدى.