كەشە، 28 قىركۇيەك "رەال مادريد" فۋتبولشىلارى مادريدتەن الماتىعا تىكەلەي رەيسپەن 8 ساعات ۇشىپ كەلگەن بولاتىن. ۇزاق جولدىڭ اسەرى مەن الداعى ويىنعا دايىندىق تۋرالى سۇراققا كوماندا باس باپكەرى حابي الونسو جاۋاپ بەردى، دەپ حابارلايدى Aqshamnews.kz.
ول ويىنعا دايىن ەكەندەرىن ايتتى.
"ۇزاق ساپار، 7 مىڭ شاقىرىمنان اسا جولدى ەڭسەرۋ ارينە، وڭاي ەمەس. ءبىراق بۇل ءبىز ءۇشىن ۇيرەنشىكتى جاعداي. ءبىز ۇنەمى بەيىمدەلۋىمىز كەرەك. ەرتەڭگى ماچقا تىڭعىلىقتى دايىندالۋىمىز قاجەت. ال الىستان كەلگەن جولدى شارشادىق دەپ سىلتاۋ ايتا المايمىز"، – دەدى باپكەر.
حابي الونسونىڭ ايتۋىنشا، باستاپقى قۇرام ويىنشىلارىنا دەمالىس بەرۋ قاراستىرىلماعان.
"قالاي بولعاندا دا ءبىز الاڭعا شىعامىز. «قايراتقا» قارسى ويناۋعا دايىندالدىق. ولاردىڭ چەمپيوندار ليگاسىنا العاش شىعىپ تۇرعانىن بىلەمىز. قارسىلاستى قىسىمعا الىپ، شابۋىلعا ءجيى شىعامىز. وتە قارقىندى ماچ بولعالى تۇر. «قايراتتىڭ» ۇيىمداسقان كوماندا ەكەنىن بىلەمىز"، – دەدى ول.
سونىمەن قاتار باپكەر قازاقستاندىق كلۋبتىڭ ويىندارىن مۇقيات باقىلاعانىن ايتتى:
"ءبىز «سەلتيككە» دە، «سپورتينگكە» دە قارسى وتكەن ماچتارىن كوردىك. «قايراتتىڭ» كومبيناسيالىق ويىنى بار، سونىمەن بىرگە تىكەلەي شابۋىلعا شىعاتىن ساتتەرىن دە بايقادىق. بۇل – مىقتى باسەكەلەس بولا الاتىن كوماندا ەكەنىن كورسەتتى"، – دەدى الونسو.
ايتا كەتەيىك، 30 قىركۇيەك كۇنى الماتىداعى ورتالىق ستاديوندا «قايرات» پەن «رەال مادريد» اراسىنداعى كەزدەسۋ وتەدى.