«قانىش جانە عىلىمي مايدان» كىتابىنىڭ تانىستىرىلىمى ءوتكىزىلدءى
«عىلىم ورداسى» عيماراتىندا ق ر پرەزيدەنتى جانىنداعى ق ر ۇلتتىق عىلىم اكادەمياسى الماتى قالاسى اكىمدىگىنىڭ قولداۋىمەن ەلىمىزدەگى عىلىم اكادەمياسىنىڭ نەگىزىن قالاۋشى، كورنەكتى عالىم، اكادەميك قانىش يمانتاي ۇلى ساتبايەۆتىڭ 125 جىلدىعىنا وراي، «وتباسى حرەستوماتياسى» قوعامدىق قورىنىڭ ارنايى جوباسىمەن شىققان «قانىش جانە عىلىمي مايدان» كىتابىنىڭ تانىستىرىلىمى وتكىزىلدى.
عۇلاما عالىمعا ارنالعان شاراداعى كىتاپتىڭ تانىستىرىلىمىنا ق ر پارلامەنتى سەناتىنىڭ دەپۋتاتى التىنبەك نۇح ۇلى، ءماجىلىسءىنىڭ دەپۋتاتى ابزال قۇسپان، ق ر پرەزيدەنتىنىڭ جانىنداعى ق ر ۇلتتىق عىلىم اكادەمياسىنىڭ باسقارما پرەزيدەنتى اقىلبەك كۇرىشبايەۆ، الماتى قالالىق قوعامدىق دامۋ باسقارماسىنىڭ باسشىسى ايدار ەسەنبەكوۆ، ساتبايەۆتىڭ نەمەرەسى، پروفەسسور ءاليما جارماعامبەتوۆا، زيالى قاۋىم وكىلدەرى مەن قوعام قايراتكەرلەرى، عالىمدار، جوو وقىتۋشىلارى، ستۋدەنتتەر مەن ب ا ق وكىلدەرى قاتىستى. شاھاردا وتكەن شارا اياسىندا اتالعان كىتاپتان تىس ەرتەرەكتە وتە از تارالىممەن شىعىپ، عىلىمي اينالىمعا ءتۇسىپ ۇلگەرمەگەن، سونداي-اق قايتا باسىپ شىعارۋعا رۇقسات ەتىلمەگەن «بالا قانىش وقىعان كىتاپتار» توپتاماسى، «قانىشتىڭ جاستىق شاعى»، «جاس قانىش» پەن «قۋعىندالعان ساتبايەۆ» كىتاپتارى دا تانىستىرىلدى.
اتالعان ەڭبەكتەردىڭ قايتا جارىققا شىعۋى قوعامدا مول سۇرانىسقا يە ەكەنىن بىلدىرەدى. قازاقتىڭ ماڭدايىنا بىتكەن اكادەميكتىڭ بار بولمىسى، شىرعالاڭ ءومىر جولى، عىلىم جولىنداعى جانقيارلىق ەرلىگى ەكزيستەنسيا ساراپتاماسىمەن سارالانىپ، تۇگەلدەي تالدانعان. عىلىم اكادەمياسىنىڭ اشىلۋىنا (1946 جىلى) اشىلۋىنا، ونىڭ تاريحي جەتىستىگىنە ساتباايەۆتىڭ قوسقان سۇبەلى ۇلەسى بار. اتالعان ەڭبەكتەردەن سونى اڭعارۋعا بولادى. زامانداستارى مۇقتار اۋەزوۆ، جۇماباي شاياحمەتوۆ، شاپىق شوكين، شاقماردان ەسەنوۆ، ەبىنەي بوكەتوۆ، ەسماعامبەت ىسمايلوۆ، بەيسەنباي كەنجەبايەۆ سىندى عالىمداردىڭ سيرەك كەزدەسەتىن، بۇرىن-سوڭدى جارىق كورمەگەن تىڭ دەرەكتەرى قامتىلىپ، ۇسىنىلعان. قازاق مادەنيەتى مەن تانىمىنا جانە ۇلتشىل تۇلعالاردىڭ ومىرىنە قىزىعاتىن بارشا وقىرمانعا ارنالعان.
«عۇلاما عالىم، قوعام قايراتكەرى قانىش ساتبايەۆتىڭ 125 جىلدىعىنا وراي جارىققا شىققان «قانىش جانە عىلىمي مايدان» كىتابى – اسا قۇندى دۇنيە. مۇنى ەل ومىرىندەگى ەلەۋلى وقيعا دەۋگە بولادى. قانىش يمانتاي ۇلى – قانشاما قيىندىققا قاراماي، عىلىم جولىندا جانكەشتىلىكپەن ەڭبەك ەتىپ، ەلىمىزدىڭ بۇگىنگى ينوۆاسيالىق دامۋ جولىنا باتىل دا سارا جول سالعان ۇلى تۇلعا. ساتبايەۆ مەتاللۋرگيادا عانا ەمەس، قازاق ادەبيەتى مەن فولكلورىنىڭ، مادەنيەتى مەن مۋزىكاسىنىڭ اسقان بىلگىرى بولدى. مىنا ەڭبەكتەردە وسى ۇلتىمىزدىڭ باي مۇراسى جان-جاقتى ايتىلادى. ۇلتىن سۇيگەن ۇلى تۇلعانى ۇلىقتاۋ – ورتاق پارىزىمىز. الماتى قالاسىنىڭ اكىمدىگى بۇل باعىتتاعى شارالاردى ۇنەمى قولداپ كەلەدى»، – دەدى الماتى قالالىق قوعامدىق دامۋ باسقارماسىنىڭ باسشىسى ايدار ەسەنبەكوۆ.