«الماتى قالاسى كۇنى» مەرەكەسىنە وراي جامبىل اتىنداعى قازاق مەملەكەتتىك اكادەميالىق فيلارمونياسىندا جەتەكشى سوليستەردىڭ قاتىسۋىمەن ماۋسىماشار كونسەرتى ءوتتى.
كەشتىڭ شىمىلدىعى فيلارمونيانىڭ 89 جىلدىق تاريحىندا قىزمەت ەتكەن قازاق ونەرىنىڭ مايتالماندارى – دينا نۇرپەيىسوۆا، امىرە قاشاۋبايەۆ، قالي جانتىلەۋوۆ، ءمۇسىلىم جانە ريشات ابدۋلليندەر، كۇلاش بايسەيىتوۆا، شارا جيەنقۇلوۆا، جامال وماروۆا، جۇسىپبەك ەلەبەكوۆ، بيبىگۇل تولەگەنوۆا، روزا باعلانوۆا، مايگۇل قازتۋعانوۆا سىندى تۇلعالاردىڭ ەسىمدەرىمەن اتالىپ، ۇلتتىق ونەر تاريحىنا شولۋمەن باستالدى.
كونسەرتتىڭ العاشقى ءبولىمى الەمگە ايگىلى يتاليان كومپوزيتورى لۋيدجي بوككەرينيدىڭ ۆيولونچەل مەن فورتەپيانوعا ارنالعان “روندو” شىعارماسىمەن اشىلدى. بۇل تۋىندى ءوز تالعامپاز ستيلىمەن كەشتى ءماندى باستاپ بەردى. كەشتە حالىقارالىق بايقاۋلاردىڭ لاۋرەاتتارى، فيلارمونيانىڭ جەتەكشى سوليستەرى مۇسا كەرىمبايەۆ، ءادىل نەسىپبايەۆ، گۇلجان وزەنبايەۆا، دينارا بازاربايەۆا-ساحامان، ەركەبۇلان ساپاربايەۆ، ايدا ايۋپوۆا سىندى ونەرپازدار ءوز ونەرلەرىن پاش ەتتى. كوپتەن بەرى كۇتكەن ماۋسىماشار تىڭدارماننىڭ ىستىق ىقىلاسىمەن باستالىپ، العاشقى تۋىندىلاردان-اق گۇل شوقتارى مەن قوشەمەتكە بولەندى.
فيلارمونيانىڭ مۋزىكالىق ساياساتى – ءداستۇرلى قازاق مۋزىكاسى مەن الەم كلاسسيكتەرىنىڭ شىعارمالارىن ناسيحاتتاۋ، وسىعان كۋا بولارلىقتاي، ساحنادا حالىق اسپاپتارىنان باستاپ، سيمفونيالىق شىعارمالارعا دەيىنگى ءارتۇرلى جانرلار ورىن الدى. كەشتىڭ جالعاسىندا قازاقتىڭ ءداستۇرلى ان-كۇيلەرى شىرقالىپ، ۇلى دالا تاريحى مەن مادەنيەتىنە قۇرمەت كورسەتىلدى.
باعدارلاما اياسىندا مادەنيەت قايراتكەرى ەرجان الىمبەتوۆ، مادەنيەت سالاسىنىڭ ۇزدىگى ماقپال قازىبەك قىزى، سونداي-اق حالىقارالىق بايقاۋلاردىڭ لاۋرەاتتارى ءبىرجان ءبازىلجان مەن جانقوجا اياپوۆ ءداستۇرلى ونەردى پاش ەتىپ، تىڭدارماندى ءتانتى ەتتى. كونسەرت قازاق ان-كۇيىمەن اياقتالىپ، كورەرمەننىڭ ەرەكشە ىستىق ىقىلاسىنا بولەندى».
