«الاتاۋ» تەاترى ەلدى-مەكەندەردەگى مىڭداعان كورەرمەنمەن قاۋىشتى
قازاقتىڭ ءداستۇرلى ونەرىن جاڭعىرتىپ، كەڭ كولەمدە ناسيحاتتاۋدى ماقسات ەتكەن «الاتاۋ» ءداستۇرلى ونەر تەاترى ەلىمىزدىڭ بىرنەشە وڭىرىندە گاسترولدىك ساپارعا شىعىپ، كورەرمەننىڭ ىستىق ىقىلاسىنا بولەندى.
گاسترول بارىسىندا تەاتر الماتى مەن جەتىسۋ وبلىستارىنىڭ 16 ەلدى مەكەنىن ارالاپ، وندا 8 مىڭعا جۋىق كورەرمەندى قامتىدى. الماتى وبلىسىنداعى نارىنقول، كەگەن، شونجى، شەلەك، جاركەنت، ەسىك، قونايەۆ، قاسكەلەڭ، مىڭباي، سونداي-اق جەتىسۋداعى تالدىقورعان، تەكەلى، سارقان، بالپىق بي، وتەناي، ۇشتوبە، سارىوزەك اۋىلدارىندا ونەر كورسەتتى. تەاتر ۇجىمى بارعان جەرىندە قويىلىمدار انشلاگپەن ءوتىپ، ۇلتتىق ونەرىن بيىك دەڭگەيدە ناسيحاتتاپ جاتتى.
ال، وڭتۇستىك وڭىرگە گاسترولدىك ساپارىن تەاتر كيەلى سىر وڭىرىنەن- قىزىلوردا قالاسىنان باستادى. بۇل ءوڭىردى تاڭداۋدىڭ وزىندىك تاريحي-مادەني ءمانى بار. قورقىت، جانقوجا، بۇقارباي، مۇستافا شوقاي، تۇرماعامبەت، نارتاي، ءابدىلدا، ءابدىجامىل سىندى ۇلى تۇلعالاردىڭ ءىزى قالعان، ونەردىڭ التىن بەسىگى.
تەاتر ديرەكتورى ماقسات نۇرالييەۆ گاسترولدىك ساپاردىڭ باستى ماقساتىن بىلاي دەپ تۇسىندىرەدى:
«تەاترىمىز قازاق حالقىنىڭ ءداستۇرلى ونەرىن ساقتاپ، ونى جاڭعىرتۋ جولىندا بەلسەندى جۇمىس اتقارىپ كەلەدى. ءبىز تەك الماتى تۇرعىندارىنا ەمەس، ەلىمىزدىڭ بارلىق وڭىرلەرىنە ساپالى قويىلىمدار ۇسىنىپ، ۇلتتىق ونەرىمىزدى كەڭىنەن ناسيحاتتاۋدى كوزدەيمىز. گاسترولدىك ساپار بارىسىندا وڭىرلەردەگى تەاترلارمەن ىنتىماقتاستىق ورناتىپ، بولاشاقتا تىڭ جوبالاردىڭ نەگىزىن قالاپ جاتىرمىز»، – دەيدى ول.
ساپار بارىسىندا تەاتر «ايمان-شولپان» مۋزىكالىق كومەدياسىن، بالالارعا ارنالعان «اگۋگاي مەن يگيگاي» قويىلىمىن جانە «التىباقان» ان-كۇي كەشىن ساحنالادى. كورەرمەندەر قويىلىمنان ەرەكشە اسەر الىپ، حالقىمىزدىڭ ءسالت-داستۇرى مەن مادەنيەتىنە تەرەڭ بويلاعان ساتتەرگە كۋا بولدى.
الدا تەاتر ۇجىمى شىمكەنت، تۇركىستان جانە جامبىل وبلىستارىنىڭ ەلدى مەكەندەرىندە گاسترولدەرىن جالعاستىرادى. جاز مەزگىلىندە گاسترولدەر شىعىس قازاقستانعا – سەمەي جانە وسكەمەن قالالارىنا باعىت الادى.
سونىمەن قاتار، تەاتر ۇجىمى حالىقارالىق دەڭگەيدە دە قازاق ونەرىن ناسيحاتتاۋعا نيەتتى. بيىل «الاتاۋ» تەاترى ماسكەۋدەگى چەحوۆ فەستيۆالىنە جانە فرانسياداعى اۆينون تەاتر فەستيۆالىنە قاتىسادى.
تەاتر ۇجىمى گاسترولدىك ساپارعا قولداۋ بىلدىرگەن الماتى، جەتىسۋ، قىزىلوردا، تۇركىستان، جامبىل وبلىستارىنىڭ اكىمدىكتەرىنە زور العىس بىلدىرەدى.