الماتىدا وتكەن دەمالىس كۇنى جارمەڭكەلەردە 10 مىڭ توننا اۋىل شارۋاشىلىعى ونىمدەرى ساتىلدى، دەپ حابارلايدى Aqshamnews.kz
الماتىلىقتار جىل باسىنان بەرى دەمالىس كۇندەرى وتەتىن جارمەڭكەلەردەن 10 مىڭ توننادان استام اۋىل شارۋاشىلىعى ونىمدەرىن ساتىپ العان. ولارعا: كوكونىستەر، جەمىستەر، ەت، ءسۇت ونىمدەرى، ازىق-تۇلىك، جۇمىرتقا، شۇجىق، بال، نان ونىمدەرى جانە تاتتىلەر – بارلىعى 1000-نان استام تاۋار تۇرلەرى جاتادى.
قاڭتار-مامىر ايلارىندا الماتى «اكك» 40-تان استام جارمەڭكە كۇنىن وتكىزدى، وعان 450 مىڭعا جۋىق الماتىلىقتار مەن قالا قوناقتارى قاتىستى. جارمەڭكەلەرگە الماتى قالاسى مەن الماتى وبلىسىنان 318 اۋىل شارۋاشىلىعى تاۋارىن وندىرۋشىلەر مەن فەرمەرلەر قاتىسۋدا. باعانى تۇراقتاندىرۋ شارالارى اياسىندا الەۋمەتتىك ماڭىزى بار ونىمدەر جارمەڭكەلەردە قولجەتىمدى باعامەن ساتىلۋدا.
جارمەڭكەلەر ءار سەنبى جانە جەكسەنبى كۇندەرى ساعات 09:00-دەن 18:00-گە دەيىن كەلەسى مەكەنجايلاردا وتەدى:
• المالى اۋدانى – كوش. ماسانشى (ايتەكە بي كوشەسى مەن گوگول كوشەسىنىڭ اراسى)؛
• اۋەزوۆ اۋدانى – كوش. وتەگەن باتىر (اباي داڭعىلىنان تومەن)؛
• بوستاندىق اۋدانى – شاعىن اۋدان. «قازاقفيلم» (ءال-فارابي داڭعىلىنىڭ ۇستىندە)؛
• مەدەۋ اۋدانى – مەڭدىقۇلوۆا بۋلۆارى – كوش. بەكتۇروۆا
• الاتاۋ اۋدانى – «مادەنيەت» تۇرعىن ءۇي كەشەنى.