«جاسىل» ەكونوميكانى دامىتۋ ماسەلەلەرىن تالقىلاندى
بۇگىن استانادا ق ر ۇلتتىق ەكونوميكا ءمينيسترى الىبەك قۋانتىروۆ بۇۇ باس حاتشىسىنىڭ كومەكشىسى، بۇۇ دامۋ باعدارلاماسى اكىمشىسىنىڭ كومەكشىسى جانە بۇۇدب ساياسات جانە باعدارلامالىق قولداۋ بيۋروسىنىڭ ديرەكتورى حاوليان شۋمەن كەزدەستى، دەپ حابارلايدى Almaty-akshamy.kz.
ءىس-شاراعا ق ر بۇۇدب تۇراقتى وكىلىنىڭ م.ا. سۋحروب حودجيماتوۆ پەن بۇۇدب دەپارتامەنتىنىڭ ديرەكتورى اينۇر بايمىرزا قاتىستى.
ۇەم باسشىسى قوناقتارعا ءىلتيپات بىلدىرە وتىرىپ، قازاقستان بىرىككەن ۇلتتار ۇيىمىمەن ىنتىماقتاستىقتى جوعارى باعالايتىنىن جانە بارلىق ماڭىزدى ماسەلەلەر بويىنشا ءوزارا ءىس-قيمىلدى ودان ءارى دامىتۋعا دايىن ەكەنىن اتاپ ءوتتى.
«ءبىز بۇۇدب-نىڭ 2021-2025 جىلدارعا ارنالعان ەلدىك باعدارلاماسىن قولدايمىز. ول ەل دامۋىنىڭ باسىم باعىتتارىن قامتيدى. ونىڭ ىشىندە الەۋمەتتىك ماسەلەلەرىنە اسا نازار اۋدارىلادى. باعدارلاما قر-دا جۇرگىزىلىپ جاتقان اۋقىمدى ساياسي جانە ەكونوميكالىق رەفورمالار اياسىندا وزەكتى بولىپ تابىلادى»، - دەدى ءا.قۋانتىروۆ.
سونىمەن قاتار، تاراپتار پاريج كەلىسىمىن راتيفيكاسيالاۋدا جانە ەكونوميكانى دەكاربونيزاسيالاۋ بويىنشا قر-دىڭ ماڭىزدى ءرولىن ەرەكشە اتاپ ءوتىپ، «جاسىل» ەكونوميكانى دامىتۋ ماسەلەلەرىن تالقىلادى.
«قازاقستان ءوز الدىنا 2060 جىلعا قاراي كومىرتەگى بەيتاراپتىعىنا قول جەتكىزۋ بويىنشا بيىك ماقسات قويدى. ءبىزدىڭ ەل تۇراقتى دامۋ ماقساتتارىن ىسكە اسىرۋدىڭ ينستيتۋسيونالدىق بازاسىن قالىپتاستىرۋعا جانە دامىتۋعا كوپ كوڭىل بولەدى. تدم-عا قول جەتكىزۋ اياسىندا 262 جەرگىلىكتى ينديكاتورلار قاراستىرىلعان، ولار مەملەكەتتىك جوسپارلاۋ جۇيەسىمەن بىرىكتىرىلگەن. بۇل ماسەلەدە ءبىز ەڭ وزىق تاجىريبەلەردى قاراستىرۋعا جانە بولاشاقتا وسى تاجىريبەنى قولدانۋعا دايىنبىز»، - دەپ حابارلادى مينيستر.
سونداي-اق، ول 16-17 ماۋسىمدا الماتى قالاسىندا وتكەن ورتالىق ازيا ەلدەرىنىڭ تدم بويىنشا ەكىنشى ءسامميتىن ۇيىمداستىرعانى ءۇشىن بۇۇدب-عا العىسىن ءبىلدىرىپ، «قازاقستان قاتىسۋشى ەلدەردىڭ گەوگرافياسىن كەڭەيتە وتىرىپ، ءۇشىنشى ءسامميتتى قابىلداۋعا دايىن»،-دەدى مينيستر.
ءوز كەزەگىندە حاوليان شۋ بۇۇ-نىڭ قازاقستاننىڭ تۇراقتى دامۋىنا قولداۋ كورسەتۋگە دايىندىعىن راستادى.
«بۇۇدب ەكونوميكانىڭ ءتۇرلى سەكتورلارىندا بىرلەسكەن جوبالاردى ىسكە اسىرۋعا مۇددەلى. اسىرەسە سالىق جانە تاريفتىك ساياسات، ءبىلىم بەرۋ جانە سيفرلاندىرۋ سالالارىندا. جالپى، قازاقستاندا تۇراقتى دامۋ ماقساتتارىنا قول جەتكىزۋ بويىنشا ۇلكەن جۇمىس جۇرگىزىلىپ جاتقانىن كورىپ وتىرمىز. بۇل سالادا سىزدەر باسقا ەلدەرگە ۇلگى بولا الاسىز»، - دەدى بۇۇ باس حاتشىسىنىڭ كومەكشىسى.