AMANAT پارتياسى جانىنداعى ازاماتتىق قوعام مەن مادەنيەتتى دامىتۋ جونىندەگى «Miras» كەڭەسى ۇلتتىق قۇندىلىقتاردى ۇلىقتاۋ، مەملەكەتتىك ءتىلدى دامىتۋ مەن حالقىمىزدىڭ مادەنيەتى، ءسالت-داستۇرىن ناسيحاتتاۋ تۇرعىسىنداعى ۇستانىمدارىن بەرىك ساقتاپ كەلەدى.
ەل تاريحىنداعى ەلەۋلى وقيعالار جاس ۇرپاقتىڭ بويىنا رۋحاني قۇندىلىقتاردى ءسىڭىرىپ، ناعىز وتانشىلدىققا تاربيەلەۋى ءتيىس. ءتۇرلى مادەني-عىلىمي ءىس-شارالار ۇيىمداستىرىپ، كوپتىڭ كوڭىلىنەن شىعا بىلگەن AMANAT پارتياسى الماتى قالالىق فيليالى ساياسي جۇمىس ءبولىمى وتكەن جىلدىڭ باسىنان باستاپ «Miras» ازاماتتىق قوعام مەن مادەنيەتتى دامىتۋ جونىندەگى كەڭەستىڭ 5 وتىرىسىن وتكىزدى. ونىڭ بىرەۋى جوسپاردان تىس ۇيىمداستىرىلعان وتىرىس بولدى. باسقوسۋ ناتيجەسىندە 13 سۇراق قارالىپ، مەملەكەتتىك جانە ءتيىستى ورگاندارعا 29 ۇسىنىس جولداندى. ماسەلەن، 17 مامىردا وتكەن جوسپاردان تىس وتىرىستا كەڭەس كينوگەرلەرىنىڭ ماسەلەسى، كينويندۋستريا مەن ۇلتتىق مەملەكەتتىك كينەماتوگرافيانى قولداۋ ورتالىعىنىڭ ماسەلەسى قارالدى. وندا ەكى تاراپ وكىلدەرىنىڭ وي-پىكىرلەرى تىڭدالىپ، تالقىلاندى.
كينەماتوگرافيستەر مادەنيەت جانە سپورت مينيسترلىگىنەن تاۋەلسىز كوميسسيا توبىن قۇرۋدى، تاۋەلسىز كوميسسيانىڭ قورىتىندىسىنا دەيىن ساراپتامالىق كەڭەستىڭ جۇمىسىن ۋاقىتشا توقتاتۋدى ۇيىمداستىرۋدى، ۇلتتىق مەملەكەتتىك كينونى قولداۋ ورتالىعىنا ۇسىنىلعان 283 جۇمىس قۇجاتىن قايتا تەكسەرۋدى جانە زاڭسىز ارەكەتتەر انىقتالعان جاعدايدا وسى ورتالىقتىڭ باسشىلىعىنا ءتيىستى شارالار قابىلداۋدى تالاپ ەتتى.
وسى تالاپ بويىنشا كەڭەستە ارنايى حاتتاما ازىرلەنىپ، ول «Miras» رەسپۋبليكالىق كەڭەسىنە جولداندى. ناتيجەسىندە ۇسىنىستار وڭ شەشىلدى. بۇدان بولەك، كەڭەستە بارلىق ۋاقىتتا دراما تەاترلارىندا قويىلىم، ساحنا مادەنيەتى، ونەر ادامدارىنىڭ ەتيكاسى، ءپاتريوتيزمدى، جاستار رۋحىن ارتتىرۋ جانە ت. ب. ماسەلەلەر قارالدى.
قازىرگى تاڭدا قوعامىمىزداعى رۋحانياتتى دامىتۋعا، يگىلىكتى، ادامگەرشىلىكتى، قايى-رىمدىلىق پەن ءوزارا تۇسىنىستىكتى ورىستەتۋگە جول اشىپ، ۇزدىك مادەني داستۇرلەردى ساقتاۋعا، مولايتۋعا ەرەكشە ءمان بەرىلۋدە، بۇل قۋانتارلىق جايت.
مۇندايدا مادەنيەتكە جوعارى باعا بەرگەن مۇحتار اۋەزوۆتىڭ «عىلىم مەن مادەنيەت بارلىق دۇنيەنىڭ التىن القاسى بولىپ وتىر» دەگەن ءسوزى بار. بۇگىندە بۇل سالاعا بارىنشا كوڭىل ءبولىنىپ، قالامىزدىڭ مادەني ءومىرىنىڭ جاندانۋىنا بارىنشا كۇش سالىنۋدا. الەم ءبىر ورىندا تۇرمايدى، ال دامۋ ۇستىندە نەشە ءتۇرلى سىن-قاتەرلەر بولۋى مۇمكىن. ەڭ باستىسى، سول سىنداردى ەڭسەرە بىلۋدە، ەڭسەرۋ جولىندا بىرىگە الۋ كەرەك.
وسى ۋاقىتقا دەيىن ەلەۋلى ەلىمىزدىڭ ءتول مادەنيەتى مەن مەملەكەتتىك ءتىلدى جاڭعىرتۋ ىسىندە كوپتەگەن جۇمىستار اتقارىلدى. بۇل يگى ىستەر ءارى قاراي دا جالعاسا بەرمەك.
بۇگىندە «AMANAT» پارتياسىنىڭ «ۇلتتىق مۇرا» پارتيالىق جوباسى دا ىسكە قوسىلىپ، سونىڭ اياسىندا 4 مىڭ ادامدى قامتيتىن ءبىرقاتار اۋقىمدى مەرەيتويلىق جانە سالتاناتتى 119 ءىس-شارا وتكىزىلگەنىن ايتا كەتكەن ءجون.
2023 جىلدىڭ باسىندا «توعىزقۇمالاق» ۇلتتىق سپورت تۇرىنەن «AMANAT CUP» ءتۋرنيرى ۇيىمداستىرىلىپ، وقۋشىلار اراسىندا تۇراقتى نەگىزدە «اسىق اتۋ»، «قازاقشا كۇرەس» جانە ت. ب. جارىستار وتكىزىلدى. اۋدانداردا اباي كۇنىنە وراي ءتۇرلى چەللەندجدەر مەن اباي وقۋلارى، ال ساتبايەۆ ۋنيۆەرسيتەتىندە قازاقستاننىڭ تۇڭعىش انتروپولوگ عالىمى ورازاق يسماگۋلوۆتىڭ «ءومىرىمنىڭ ءمانى مەن ءسانى» اتتى كىتابىنىڭ تۇساۋكەسەرى ءوتتى. قالا مەكتەپتەرىندە وقۋشىلار اراسىندا ۇلتتىق ويىنداردان جارىستار ۇيىمداستىرىلدى.
قازاقستان حالىقتارىنىڭ بىرلىگى كۇنىنە وراي قحا-مەن بىرلەسىپ «بىرلىك تۋى –AMANAT» قايىرىمدىلىق جارمەڭكەسى ۇيىمداستىرىلدى. ءىس-شارا اياسىندا الەمنىڭ ءتۇرلى ەلدەرىنەن كەلگەن اسۇيلەردىڭ اسپازدىق تاعامدارى ۇسىنىلدى.
«كىتاپ – AMANAT» ورتالىعىندا رەسپۋبليكا كۇنىنە وراي ەگەمەندىك تۋرالى دەكلاراسيانى ازىرلەۋگە تىكەلەي قاتىسقان جانە تاۋەلسىزدىك جىلدارى ەل ىرگەسىن قالاۋدا ەڭبەك ەتكەن قۇرمەتتى ازاماتتارمەن كەزدەسۋ ءوتت. وعان كەڭەس مۇشەسى، جازۋشى، قازاقستاننىڭ ەڭبەك سىڭىرگەن قايراتكەرى ساۋلە دوسجان، قوعام قايراتكەرى، جازۋشى-پۋبليسيست، پروفەسسور مارات توقاشبايەۆ، بەلگىلى اقىن، «كوك تۋدىڭ جەلبىرەگەنى» ءانىنىڭ اۆتورى الماس ساقبايەۆ قاتىستى. سونىمەن قاتار ورتالىقتا جوبا اياسىندا دارابوز دارىن، اقىن مارالتاي ىبىرايەۆتىڭ وقىرماندارمەن شىعارماشىلىق كەزدەسۋى ءوتتى.
سونداي-اق، قالانىڭ مادەنيەت سالاسىنداعى ماسەلەلەرى تالقىلانىپ، كورنەكتى قايراتكەرلەردىڭ مەرەيتويلارى وتكىزىلدى. بۇل قالادا اتقارىلىپ جاتقان جۇمىستاردىڭ ءبىر بولىگى عانا. الدا ءالى ءبىرقاتار جۇمىستار جالعاسىن تاباتىن بولادى.