الماتىدا ۇلتتىق قۇندىلىقتارعا ارنالعان عىلىمي-پراكتيكالىق كونفەرەنسيا ءوتتى.
31 قازانىندا الماتى قالاسىنداعى رەسپۋبليكالىق عىلىمي-پەداگوگيكالىق كىتاپحانادا «ۇلتتىق قۇندىلىقتار اكادەمياسى» رەسپۋبليكالىق قوعامدىق بىرلەستىگىنىڭ ۇيىمداستىرۋىمەن «ۇلتتىق قۇندىلىقتار: تانىم، تاعىلىم. ادال ازامات» اتتى عىلىمي-پراكتيكالىق كونفەرەنسيا ءوتتى.
شاراعا ءماجىلىس دەپۋتاتى مۇرات ابەنوۆ، قوعام قايراتكەرى اسىلى وسمان، قازاقستاننىڭ ەڭبەك ەرى، بىلىكتى پەداگوگ اياگۇل ميرازوۆا، ەلىمىزدىڭ الەۋمەتتىك-ەكونوميكالىق دامۋىنا ەلەۋلى ۇلەس قوسىپ جۇرگەن قوعام قايراتكەرلەرى، ق ر وقۋ-اعارتۋ مينيسترلىگىنىڭ، «امانات» پارتياسىنىڭ، الماتى قالالىق جانە اۋداندىق ءماسليحاتتارىنىڭ وكىلدەرى، عالىمدار، پەداگوگ-پراكتيكتەر، جازۋشىلار مەن وقۋلىق اۆتورلارى، سونداي-اق قوعامدىق ۇيىمدار مەن باسپا جانە ب ا ق وكىلدەرى قاتىستى.
كونفەرەنسيادا ۇلتتىق قۇندىلىقتاردىڭ ءبىلىم مەن تاربيەنىڭ ءبىرتۇتاستىعىن قامتاماسىز ەتۋدەگى ءرولى، سونىمەن قاتار ولاردى ءعىلىمي-ادىسنامالىق جانە پراكتيكالىق تۇرعىدا ىسكە اسىرۋ جولدارى تالقىلاندى. قاتىسۋشىلار قۇندىلىققا باعدارلانعان تاربيە جۇمىستارىنىڭ ۇزدىك تاجىريبەلەرىمەن ءبولىسىپ، ءوز ۇسىنىستارىن ورتاعا سالدى.
شارا اياسىندا كوركەم ادەبيەتتەر مەن وقۋلىقتار كورمەسى ۇيىمداستىرىلدى. كورمەگە «اتامۇرا»، «الماتىكىتاپ»، «ارمان-پۆ»، «كوكجيەك»، «مەكتەپ» سىندى ءىرى باسپالار ءوز ونىمدەرىن ۇسىندى. سونداي-اق زەرتتەۋ ناتيجەلەرى نەگىزىندە دايىندالعان عىلىمي ۇجىمدىق ەڭبەكتەردىڭ تۇساۋكەسەرى ءوتتى.
كونفەرەنسيا مازمۇندى دا تاعىلىمدى ءوتتى. قوناقتار مەن قاتىسۋشىلار وقۋشىلار مەن پەداگوگتەردىڭ ونەرىن تاماشالاپ، رۋحاني قۇندىلىقتاردىڭ قوعام ومىرىندەگى ماڭىزىن تاعى ءبىر مارتە ايقىندادى.