بىشكەكتەگى جەكەمەنشىك مەكتەپتەردىڭ بىرىندە جاپپاي ۋلانۋ تىركەلدى. ۋلانعانداردىڭ ءبارى تۇسكى اسقا شاۋرما جەگەن، - دەپ حابارلايدى aqshamnews.kz ءتىلشىسى 24.kg سايتىنا سىلتەمە جاساپ.
قىرعىزستان دەنساۋلىق ساقتاۋ مينيسترلىگىنىڭ مالىمەتىنشە، 31 قازاندا ساعات 22:30-دا رەسپۋبليكالىق كلينيكالىق جۇقپالى اۋرۋلار اۋرۋحاناسىنا تاعامنان ۋلانۋ بەلگىلەرى بار ناۋقاستار تۇسە باستاعان. بارلىق ناۋقاستىڭ 12:00-13:00 ارالىعىندا مەكتەپ اسحاناسىندا شاۋرما جەگەنى انىقتالدى.
بارلىعى 58 ناۋقاس مەديسينالىق كومەككە جۇگىنگەن، ولاردىڭ 54ء-ى - بالا.
"7 بالا جانە 2 ەرەسەك اۋرۋحاناعا جاتقىزىلدى، جاعدايى تۇراقتى. 49 ناۋقاس قاراۋدان جانە مەديسينالىق كومەك كورسەتىلگەننەن كەيىن ءتيىستى نۇسقاۋلىقپەن امبۋلاتورلىق ەمدەۋگە جىبەرىلدى. بارلىق ناۋقاستان تالداۋلار الىندى"، - دەلىنگەن جاريالانىمدا.
سانيتارلىق-ەپيدەميولوگيالىق قىزمەت ماماندارى بۇل وقيعا بويىنشا تەرگەۋدى جالعاستىرىپ جاتىر.