الماتى قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتى ۇرىپ-سوعۋ فاكتىسى بويىنشا راحات تۇرلىحانوۆقا قاتىستى اكىمشىلىك ءىستى قارادى، دەپ حابارلايدى Almaty-akshamy.kz
سوتپەن انىقتالعانىنداي، وتكەن جىلدىڭ جەلتوقسان ايىندا راحات تۇرلىحانوۆ ۇيىندە جانجال شىعارىپ، ايەلىن سوققىعا جىققان. سوت وتىرىسىندا ول ءوز كىناسىن مويىنداپ، ىستەگەن ىسىنە وكىنىتىنىن جەتىكىزدى. سونداي-اق، تاتۋلاسقاندارىن ايتىپ، سوتتان ءىستى توقتاتۋدى سۇرادى.
ايەلى ءىس ماتەريالدارىندا كورسەتىلگەن فاكتىلەردى راستاپ، كۇيەۋىمەن تاتۋلاسقانىن ايتتى.
«سوت قاۋلىسىمەن ت.، اقبتك-نىڭ 73-2 بابى 1-1 بولىگى بويىنشا اكىمشىلىك قۇقىق بۇزۋشىلىقتى جاساعانى ءۇشىن كىنالى دەپ تانىلىپ، ول ەسكەرتۋ تۇرىندەگى اكىمشىلىك جازاعا تارتىلدى»، - دەپ حابارلادى قالالىق سوتتان.
سوت قاۋلىسى زاڭدى كۇشىنە ەنگەن جوق.