ەنەرگەتيكا مينيسترلىگى اي-92 بەنزينىنىڭ قىمباتتاۋى مەن اۆتوگاز بويىنشا ۇزىلىستەرگە قاتىستى شاعىمداردى قابىلداۋعا ارنالعان جەدەل جەلىنى ىسكە قوستى، - دەپ حابارلايدى aqshamnews.kz ءتىلشىسى.
ەگەر ءسىز اي-92 ماركالى بەنزين باعاسىنىڭ نەگىزسىز ءوسۋىن نەمەسە اجقس-تار جانارمايدىڭ بولماۋىن بايقاساڭىز، مينيسترلىك جەدەل جەلى تەلەفونىنا حابارلاسۋدى سۇرايدى: +7 701 855 0248. وتىنىشتەر تاۋلىك بويى، 24/7 رەجيمىندە قابىلدانادى.
"باسەكەلەستىكتى قورعاۋ جانە دامىتۋ اگەنتتىگىمەن جانە وڭىرلىك شتابتارمەن بىرلەسىپ، الىپساتارلىق پەن وتىننىڭ جاساندى تاپشىلىعىن تۋعىزۋعا باعىتتالعان كەز كەلگەن ارەكەتتەرگە قاتاڭ توسقاۋىل قويادى"، - دەپ مالىمدەدى ۆەدومستۆو.
مينيسترلىك بارلىق قاجەت وتىن كولەمى وڭىرلەردىڭ وتىنىمدەرىنە سايكەس جونەلتىلىپ، مۇناي بازالارىندا ساقتالىپ تۇرعانىن اتاپ ءوتتى. تاپشىلىققا سەبەپ بولاتىن وبەكتيۆ فاكتورلار جوق.
"سۇيىتىلعان مۇناي گازى بويىنشا: ءوندىرۋشى زاۋىتتاردىڭ بىرىندە جۇرگىزىلگەن جوسپارلى جوندەۋ جۇمىستارى مينيسترلىك تاراپىنان الدىن الا ەسكەرىلىپ، جوعارى سۇرانىس بايقالاتىن وڭىرلەر ءۇشىن قوسىمشا كولەمدەر ءبولىندى. سوندىقتان كەيبىر گاز قۇيۋ بەكەتتەرىندەگى كەزەكتەر جۇيەلى تاپشىلىقپەن ەمەس، ىشكى ءبولۋ جانە لوگيستيكا ماسەلەلەرىمەن بايلانىستى"، - دەپ ءتۇسىندىردى ەنەرگەتيكا مينيسترلىگى.
ۆەدومستۆو ءاربىر ءوتىنىش مۇقيات قارالىپ، راستالعان جاعدايدا ادال ەمەس نارىق قاتىسۋشىلارىنا قاتىستى ءتيىستى شارالار قابىلداناتىنىن ايتتى.