الماتى قالاسىنىڭ مامانداندىرىلعان ەكولوگيالىق پروكۋراتۋراسى مەن قالالىق ەكولوگيا جانە قورشاعان ورتا باسقارماسى، "ىلە-الاتاۋ مەملەكەتتىك ۇلتتىق تابيعي پاركىمەن" بىرلەسىپ، ايۋساي شاتقالىندا ەكولوگيالىق سەنبىلىك وتكىزدى.
ماقسات– تابيعي اۋماقتاردى تازا ۇستاۋ، ادامداردىڭ ەكولوگيالىق مادەنيەتىن كوتەرۋ. ۇلتتىق ساياباقتىڭ اۋماعى تۇرمىستىق قالدىقتاردان تازارتىلىپ، جينالعان قوقىس پوليگونعا شىعارىلدى. سەنبىلىككە مەملەكەتتىك ورگانداردىڭ وكىلدەرى، ەكولوگيالىق ۇيىمدار، ستۋدەنتتەر مەن بەلسەندى جاستار قاتىستى.
الماتى قالاسى ەكولوگيا جانە قورشاعان ورتا باسقارماسىنىڭ قالدىقتاردى باسقارۋ ءبولىمىنىڭ باس مامانى ەركەبۇلان ەرتاي ۇلى جىل باسىنان بەرى الماتى قالاسى بويىنشا 300-دەن استام ەكولوگيالىق ءىس-شارا ۇيىمداستىرىلعانىن ايتتى. ولاردىڭ قاتارىندا سەنبىلىكتەر، تۇرمىستىق قالدىقتاردى بولەك جيناۋ اكسيالارى، پلاستيكالىق بوتەلكەلەر مەن قاقپاقتاردى جيناۋعا ارنالعان "مەيىرىمدى قاقپاق" سەكىلدى ەكولوگيالىق باستامالار بار.
"سەنبىلىكتەردى ءبىز قالا اۋماعىندا عانا ەمەس، تاۋ شاتقالدارىندا دا ءجيى وتكىزەمىز. كوبىنە ۇلتتىق ساياباقتار مەن تابيعي اۋماقتاردىڭ ءوتىنىشى بويىنشا ۇيىمداستىرىلادى"،- دەدى ول.
ال ەكولوگ ەۆگەنيي مۇحامەدجانوۆتىڭ ايتۋىنشا، تابيعاتتى قورعاۋ مەن تازالىقتى ساقتاۋ اركىمنىڭ ىشكى مادەنيەتى مەن ومىرگە دەگەن كوزقاراسىنا بايلانىستى.
"ءوزىن سىيلايتىن، ءوزىن قۇرمەتتەيتىن ادام ەشقاشان قوقىس تاستامايدى. ەكولوگيالىق مادەنيەت – تەك تابيعاتتى قورعاۋ ەمەس، ول قوعامنىڭ وزىنە جانە بولاشاعىنا دەگەن قۇرمەتىنىڭ كورىنىسى. سوندىقتان بوس ۇراندار مەن پلاكاتتاردىڭ قاجەتى شامالى"، -دەيدى ەكولوگ.
سونداي-اق، ول كەيىنگى جىلدارى الماتى قالاسىندا ەكولوگيالىق مادەنيەت ەداۋىر جاقسارعانىن اتاپ ءوتتى:
"مەن بۇل ىسپەن جەتى جىلدان بەرى اينالىسامىن. سول ۋاقىت ىشىندە قالا قاتتى وزگەردى. بۇرىن الماتى كوشەلەرى قوقىسقا تولى ەدى، ءقازىر جاعداي الدەقايدا جاقسارعان. ءتىپتى، ءقازىر سەنبىلىك وتكىزەتىن ورىن تابۋ دا قيىنداپ بارادى، سەبەبى قالا تازا. وسىنداي ءىس-شارالار ارقىلى قوعامدا بىرتىندەپ ورتاق ەكولوگيالىق سانا قالىپتاسىپ كەلەدى.بۇرىن كوشەلەردە تەمەكى تۇقىلى مەن بوتەلكە كوپ بولاتىن، ال ءقازىر ادامدار ونداي ارەكەتكە بارمايدى. مۇمكىن، تاعى ون جىلدان كەيىن ءبارىمىز ءبىر رەتتىك پلاستيكتى قولدانباي، ءوز ىدىسىمىزدى الىپ جۇرەتىن بولامىز. مىنە، ناعىز مادەنيەتتى قوعامنىڭ كورىنىسى وسى. ءبىزدىڭ ۆولونتەرلەر قوزعالىسى كەيىنگى ەكى جىلدا بەلسەندى دامىپ كەلەدى. بۇرىن نەگىزىنەن ءىرى كومپانيالارمەن جۇمىس ىستەسەك، ءقازىر مىڭداعان ەرىكتى ءوز ەركىمەن قاتارىمىزعا قوسىلىپ جاتىر. ەڭ كىشكەنتاي ۆولونتەرىمىز – 9 جاستا، ال ۇلكەندەرى – 60–70 جاستاعى ادامدار. ەكولوگيالىق قوزعالىستىڭ بارلىق جاستاعى ازاماتتار ءۇشىن ورتاق قۇندىلىققا اينالعانىنىڭ دالەلى دەۋگە ابدەن بولادى"،-دەيدى ەۆگەنيي مۇحامەدجانوۆ.