قازاقستان قۇراماسى 22-31 قازان ارالىعىندا باحرەيننىڭ ماناما قالاسىندا وتكەن ءۇشىنشى جاسوسپىرىمدەر اراسىنداعى ازيا ويىندارىندا ونەرىن كورسەتۋىن اياقتادى، - دەپ حابارلايدى aqshamnews.kz ءتىلشىسى.
جارىس قورىتىندىسى بويىنشا ۇلتتىق قۇراما جالپىكوماندالىق ەسەپتە ءۇشىنشى ورىنعا يە بولدى. وتانداستارىمىز 93 مەدال جەڭىپ الدى. ونىڭ ىشىندە – 24 التىن، 29 كۇمىس جانە 40 قولا جۇلدە.
ءبىرىنشى ورىنعا 147 مەدالمەن (63 التىن، 49 كۇمىس، 35 قولا) جۇڭگو قۇراماسى يە بولدى. 81 مەدال (37 التىن، 16 كۇمىس، 28 قولا) ەنشىلەگەن وزبەكستان ەكىنشى ورىنعا جايعاستى.
قازاقستاندىق سپورتشىلار جيىرمادان استام سپورت ءتۇرى بويىنشا ب ا ق سىناپ، جۇلدەلى ورىندارمەن قاتار، بىرنەشە رەكورد جاڭارتتى.
اۋىر اتلەت ءاليحان اسكەرباي بىردەن بىرنەشە جوعارى جەتىستىككە قول جەتكىزدى. ول جۇلقا كوتەرۋدە جانە سەرپە كوتەرۋدە جاسوسپىرىمدەر اراسىنداعى الەم، ازيا جانە ازيا ويىندارىنىڭ رەكوردتارىن جاڭارتتى.
جەڭىل اتلەت ماكسيم ساجنيەۆ، جۇزگىش الەكساندر رۋمىنسكيي جانە زىلتەمىرشى نۇرجان جۇماباي دا جاسوسپىرىمدەر اراسىنداعى ازيا ويىندارىنىڭ رەكوردىن جاڭارتتى.
قازاقستاندىق بوكسشىلار ەڭ كوپ التىن مەدالدى جەڭىپ الدى (5 التىن). دزيۋدوشىلار ءتورت التىن، ال اۋىر اتلەتتەر ءۇش التىن جۇلدەگە يە بولدى.
قازاقستان قۇراماسى ءوز تاريحىندا ەڭ جوعارى كورسەتكىشكە قول جەتكىزدى. 2009 جىلى سينگاپۋردا وتكەن العاشقى جاسوسپىرىمدەر اراسىنداعى ازيا ويىندارىندا ەل قورجىنىندا نەبارى 14 مەدال (4 التىن، 6 كۇمىس، 4 قولا) بولىپ، جالپى ەسەپتە سەگىزىنشى ورىن العان ەدى.
2013 جىلى قىتايدىڭ نانكين قالاسىندا وتكەن جارىستا وتانداستارىمىز 13 مەدال (1 التىن، 4 كۇمىس، 8 قولا) جەڭىپ الىپ، 13-ورىنعا تابان تىرەگەن بولاتىن.