جۋىردا تايۆان ەلىندە تاريحتا العاش رەت حالىقارالىق وليمپيادالىق كوميتەتتىڭ ۇيىمداستىرۋىمەن شەبەرلەر اراسىندا دزيۋدودان وتكەن بۇكىلالەمدىك جازعى ويىندارىندا قولادان مەدال تاققان الماتىلىق داستان زينالييەۆ – مەملەكەتتىك قىزمەتشى. ال مەملەكەتتىك قىزمەتتە ءجۇرىپ تە ۇلكەن سپورتتىڭ ءوليمپىن باعىندىرىپ كەلە جاتقان بىلەكتى، جۇرەكتى ازاماتتار ءقازىر نەكەن-ساياق.
ءبىز بۇگىن كۇرەستەن ەكى دۇركىن الەم چەمپيونى، بىرنەشە مارتە قولا جانە كۇمىس جۇلدەگەر، 16 جىلدان استام ۋاقىتتان بەرى مەملەكەتتىك قىزمەتتە جۇرگەن الماتى قالالىق جوسپارلاۋ جانە ۋربانيستيكا باسقارماسىنىڭ ءبولىم باسشىسى داستان اراپ ۇلى تۋرالى از-كەم ايتاتىن بولامىز.
وتكەنگە ءسال شەگىنىس. داستان مۇعالىمدەر وتباسىندا دۇنيەگە كەلگەن. اكەسى زينالي ۇلىنىڭ كەۋدەسىندەگى ساۋلەنى ەرتەرەك بايقاپ، عالىم ءىنىسى ادام مەكەبايەۆ سەكىلدى جازۋشى بولعانىن قالاپ، ۇيدەگى جەكە كىتاپحاناسىنداعى الەم كلاسسيكتەرىنىڭ بۇكىل شىعارماسىن وقىتتى. ءتورتىنشى سىنىپتان باستاپ اۋىلداعى مۋزىكا ۇيىرمەسىنە دە بەردى. ءبىراق العىر دا زەرەك كىشكەنتاي داستان ەكى جىلدا بۇكىل نوتانى جاتتاعانمەن، بىردە-بىر مۋزىكالىق اسپاپتى يگەرە الماپتى. سول جىلدارى مۋزىكا ۇيىرمەسىنىڭ جانىندا ورنالاسقان سپورت مەكتەبىنە قاشىپ كەتە بەرەتىن بولىپتى.
اكەسى ونى التىنشى سىنىبىندا الماتىداعى جۋرناليست دايىندايتىن ەكى مەكتەپكە وقۋعا تۇسىرەدى. مۇندا ءجۇرىپ تە سپورتقا كوڭىلى اۋا بەرىپ، بوكس، كۇرەس ۇيىرمەسىنەن تابىلدى. توعىزىنشىدا وقىپ جۇرگەندە اۋىلعا ورالىپ، كۇرەستى قايتا باستايدى. ءبىراق توقىراۋ جىلدارى ول مەكتەپ جابىلىپ قالادى. دەگەنمەن، سپورتقا دەگەن ىقىلاسى ارتپاسا كەمىمەگەن داستان ءوز بەتىنشە جاتتىعۋدى توقتاتپايدى. ناعىز شىنىققان شاققا قادام باسقان ستۋدەنت كەزىندە ەركىن كۇرەستىڭ اتاقتى باپكەرى داڭقتى بالۋان حايدار قارپىقوۆتا، ادىلبەك سەرىكبايەۆتا جاتتىعىپ، سامبودان سپورت شەبەرى دارەجەسىنە دەيىن جەتتى. اكەسى بىلەكتى ۇلدىڭ تاڭداعان جولىن ءتۇسىنىپ، قۇپتاپ، باتاسىن بەرىپ، باستاماشىل بولىپ، باۋىرى داۋلەتتىڭ ۇيىمداستىرۋىمەن 2015 جىلى كەتە پرايد كلۋبىن اشتى. وسى كلۋبتان دزيۋدو، سامبو كۇرەسىنەن الەم، وليمپيادا جەڭىمپازدارى شىقتى.
داستان زينالييەۆ جيىرما جاسىندا شاڭىراق كوتەرىپ، بالا تاربيەسى، وتباسى قۇندىلىعىن دارىپتەۋ دەگەن تىرشىلىك تەربەلىسىندە قوعامدىق جۇمىستارمەن دە اينالىستى، ەكولوگ-ۆولونتەر دا بولدى. مەملەكەتتىك قىزمەتتى دە قاتار ۇستاپ جۇرگەن ساتىندە ارادا جيىرما جىلدان اسا ۋاقىت ءۇزىلىس بولىپ قالعانى بار. ءبىراق سپورتقا دەگەن ماحابباتى سونشا جىل جۇرەگىنىڭ تۇبىندە قۇنداقتاۋلى جاتقان بولاتىن. سول ىنتا-ىقىلاس داستان زينالييەۆتى بوز كىلەمگە قايتادان جەتەلەپ اكەلدى. ەندى، مىنە، ءۇش جىلدان بەرى ەلىمىزدىڭ كوك بايراعىن الەمدىك دودالاردا جەلبىرەتىپ ءجۇر.
دزيۋدو، سامبو، قازاق كۇرەسى، ەركىن كۇرەستەن رەسپۋبليكالىق تۋرنيرلەردىڭ، رەسەي، بولگاريا، گرەسيا، حورۆاتيا، تاجىكستاندا وتكەن الەم چەمپيوناتتارىنىڭ بىرنەشە دۇركىن جەڭىمپازى جانە جۇلدەگەرى. ونىڭ جۇلدە قورى تۇيە بالۋان، جاۋىنگەرلىك كۇرەستەن، گرەپلينگ كۇرەسىنەن، دجيۋ-دجيتسۋدان دا تولىققان.
ال بيىلعى مامىردا تايۆاندا قول جەتكىزگەن ايتۋلى جۇلدەسى داستان زينالييەۆتىڭ ناعىز كۇرەسكەر سپورتشى ەكەندىگىنىڭ تاعى ءبىر دالەلى. بۇگىنگى كۇنى ءدال وسىلاي شەبەرلەر (ارداگەر) اراسىندا كۇرەسىپ جۇرگەن سپورتشىلاردىڭ ىشىندە مەملەكەتتىك قىزمەتپەن قاتار قىرىقتان اسقاندا ەرلەر اراسىنان الەم چەمپيونى، بىرنەشە رەت فينالعا شىعىپ جۇلدەگەر بولعانى كەمدە-كەم.
"داستان زينالييەۆ باسقارمانىڭ جەر-وندىرىستىك بولىمىنە جەتەكشىلىك ەتەدى. حالىقپەن، الەۋمەتپەن تىكەلەي بايلانىستا جۇمىس ىستەيتىن ەڭ كۇردەلى سالا. مەگاپوليستىڭ جەر ۋچاسكەلەرىن بەرۋ نەمەسە نىسانالى ماقساتىن وزگەرتۋ تۇرعىسىنداعى ماسەلەلەردى شەشۋمەن اينالىسادى. كۇنىنە 40–50 ءوتىنىشتى قاراۋىنا تۋرا كەلەدى. ءوزى سپورتتىڭ ادامى بولعاندىقتان با، اسا ۇستامدى، ديپلومات، ۇلكەن-كىشىمەن دە ءتىل تابىسا كەتەدى. ءقازىر جۇمىسىمىزدىڭ ءبارى سيفرلاندىرۋعا كوشكەنىمەن، ماسەلەنىڭ ءمان-جايىن كوزبە-كوز جۇزدەسە وتىرىپ بىلگىسى كەلەتىن تۇرعىندار دا بار. جاسىراتىنى جوق، كەيدە ءجاي كەلمەي، مىنەز كورسەتە كەلەتىنى دە جوق ەمەس. سونداي ساتتەردە داستان اراپ ۇلىنىڭ ءبارىن بايسالدى قارسى الىپ، ساباسىنا ءتۇسىرىپ، ءمان-جايدى سابىرمەن ءتۇسىندىرىپ، ماسەلەسىن وڭ شەشىپ، شىعارىپ سالىپ تۇرعانىن تالاي كورگەنبىز. سپورتتىڭ مىنەزدى دە تاربيەلەيتىنى راس-اۋ"، - دەيدى الماتى قالالىق جوسپارلاۋ جانە ۋربانيستيكا باسقارماسىنىڭ باس مامانى تالعات ابدۋاللييەۆ.
"داستان ەكەۋمىز ءبىر اۋىلدانبىز. ونى سپورتپەن ەگىز تۋعان دەسەم، قاتەلەسپەسپىن. بالا كۇنىنەن العىر، ەپتى، شيراق بولاتىن. الماتىدا دا بوز كىلەمدە قايتا توعىستىق. مەملەكەتتىك قىزمەتتە جۇرسە دە، اپتاسىنا ءۇش مارتە جاتتىعۋعا كەلىپ تۇرادى. بوز كىلەمدە ونىڭ ەكىنشى تىنىسى اشىلاتىنىن سەزەمىن. جانىپ كەتەدى. ۇنەمى جايدارى جۇرەدى. تالاپشىل. تەمىردەي ءتارتىپتىڭ، ءبىر ءسوزدىڭ ادامى. ونىڭ تىلەكشى كوڭىلىن جاسقى تۇسىنەتىن جاستار ۇنەمى اينالاسىندا ءۇيىرىلىپ جۇرەدى. بولدىم، تولدىم دەمەيدى، جاستارمەن ءالى كۇنگە بىرگە جاتتىعىپ، جول كورسەتىپ، بىلگەنىمەن ءبولىسىپ وتىرادى"، - دەيدى دزيۋدودان ارداگەرلەر اراسىنداعى الەم چەمپيونى ناسرەددين ايتىموۆ.
وتباسىنداعى، اۋلەتتەگى بەدەلىنە بىرگە جۇرگەن ءبىز كۋا. ەكى سالانى اقساتپاي قاتار الىپ جۇرگەن قازاقتىڭ جۇرەكتى وسىنداي جىگىتتەرى قوعامعا ءسوزسىز كەرەك دەپ ويلايمىن.
"ماعان داستان اراپ ۇلىنىڭ ەڭبەكقورلىعى، التىن ۋاقىتىن ۇتىمدى پايدالانا بىلەتىن قاسيەتى ۇنايدى. جاستاردىڭ ساناسىنا جىگىتتىڭ جاۋى جالقاۋلىق ەكەنىن ۇنەمى قۇيىپ وتىرادى. وتە تاماشا ادام. بىلىكتى ترەنەر. بوز كىلەمدە بىرگە جاتتىعامىز. ءوزىن ۇلكەنمەن دە، كىشىمەن دە تەڭ ۇستايتىنى كوپكە ۇلگى بولارلىق، - دەدى دزيۋدودان پاراليمپيادا ويىندارىنىڭ كۇمىس جۇلدەگەرى داۋلەت تەمىرجان.
ۇيىمداستىرۋشىلىق قابىلەتى وتە زور. اينالاسىنا سپورتتى سۇيەتىن جاسوسپىرىمدەر تۇرماق، ءوزىنىڭ قاتارلاستارى دا توپتاسا قالاتىنىنا تاڭدانامىن، وتە كوپشىل ادام. شاكىرتتەرى اراسىنان الەم جانە وليمپيادا چەمپيوندارى كوپتەپ شىقسا دەگەن اسقاق ارمانى دا بار. ول مۇراتىنا جەتەتىنى دە انىق. مەن مەملەكەتتىك قىزمەتتە جۇرسە دە جۇرەك قالاۋىنان الىستاي الماعان شىن كۇرەسكەر وسىنداي سپورتشى ازاماتپەن بىرگە جۇرگەنىمدى ماقتان ەتەمىن.