الماتى قالاسىندا كۇزەت اگەنتتىگى رەتىندە تىركەلىپ، زاڭسىز ارەكەتتەرمەن اينالىسقان قارۋلى ۇيىمداسقان قىلمىستىق توپ (ۇقت) اشكەرەلەندى.
قىلمىستىق توپتىڭ مۇشەلەرى كاسىپكەرلەرگە قىسىم كورسەتىپ، نىساندارىن كۇشپەن تارتىپ الىپ وتىرعان. ولار ادامداردى ۇرلاپ، بوپسالاپ، فيزيكالىق جانە پسيحولوگيالىق زورلىق-زومبىلىققا دا بارعان، دەپ حابارلايدى aqshamnews.kz.
ىشكى ىستەر مينيسترلىگىنىڭ حابارلاۋىنشا، بۇل توپ ويىن-ساۋىق ورىندارىنىڭ يەلەرى مەن قىزمەتكەرلەرىنە كۇش قولدانۋ ارقىلى كاسىپكەرلىك نىساندارىن يەمدەنىپ، كەيىن سول جەردە «قاۋىپسىزدىك قىزمەتىن» اتقارعان سىڭاي تانىتقان.
ۇيىمداسقان قىلمىستىق توپتى ۇقتب (ۇيىمداسقان قىلمىسقا قارسى كۇرەس باسقارماسى) قىزمەتكەرلەرى ۇقك مەن پروكۋراتۋرانىڭ ۇيلەستىرۋىمەن جويدى. ارنايى وپەراسيا ناتيجەسىندە الماتى، جەتىسۋ، تۇركىستان، ماڭعىستاۋ، جامبىل جانە الماتى وبلىستارىندا توپتىڭ 20 مۇشەسى ۇستالدى.
تەرگەۋ بارىسىندا 40-تان استام ءتىنتۋ جۇرگىزىلىپ، 7 بىرلىك اتىس قارۋى – ونىڭ ىشىندە 3 كەسىلگەن اڭشى مىلتىعى، ماكاروۆ تاپانشاسى، كالاشنيكوۆ اۆتوماتى جانە 100-دەن استام ءوق-دارى تاركىلەندى. بۇل تۋرالى ءىىم ۇيىمداسقان قىلمىسپەن كۇرەس دەپارتامەنتىنىڭ وكىلى قۋاندىق الپىس مالىمدەدى.
قازىرگى ۋاقىتتا بۇزاقىلىق، بوپسالاۋ، ادام ۇرلاۋ، ءوز بەتىمەن ارەكەت ەتۋ جانە دەنساۋلىققا زيان كەلتىرۋ دەرەكتەرى بويىنشا قىلمىستىق ىستەر تەرگەلىپ جاتىر. سونىمەن قاتار، توپ باسشىسى مەن مۇشەلەرىنە قاتىستى ۇقت قۇرۋ، وعان جەتەكشىلىك ەتۋ جانە قاتىسۋ بويىنشا سوتقا دەيىنگى تەرگەۋ امالدارى جۇرگىزىلۋدە. ولار باسقا دا وسىعان ۇقساس قىلمىستارعا قاتىسى بار-جوعى بويىنشا تەكسەرىلۋدە.
ءىىم مالىمدەۋىنشە، بيزنەسكە قىسىم كورسەتۋ جانە قىلمىستىق ارالاسۋ ارەكەتتەرى مەملەكەت باقىلاۋىندا. زاڭعا قايشى كەز كەلگەن ارەكەت قاتاڭ تۇردە توقتاتىلادى.