ۇلاننىڭ وفيسەرى ءۇش دۇركىن ازيا چەمپيونى اتاندى

ول فينالدا وزبەكستاندىق دجابرايل شاپييەۆتى 5:2 ەسەبىمەن جەڭدى.

ق ر ۇلتتىق ۇلانىنىڭ سپورت كومانداسىن دايارلاۋ ورتالىعىنىڭ اسكەري قىزمەتشىسى ازامات داۋلەتبەكوۆ ەركىن كۇرەستەن 2024 جىلعى ازيا ويىندارىنىڭ چەمپيونى اتاندى، دەپ حابارلايدى Almaty-akshamy.kz Polisia.kz-كە سىلتەمە جاساپ.

وليمپيادا ليسەنزياسىنىڭ يەگەرى ازامات داۋلەتبەكوۆ قىرعىز رەسپۋبليكاسىنىڭ استاناسىندا ءوتىپ جاتقان بايراقتى باسەكەدە 86 كەلى سالماق دارەجەسىندە ونەر كورسەتتى. ق ر ءىىم ۇۇ وفيسەرى فينالدا وزبەكستاندىق دجابرايل شاپييەۆتى 5:2 ەسەبىمەن جەڭدى.

«بۇل مەنىڭ سارى قۇرلىق چەمپيوناتىندا قاتارىنان العان ءۇشىنشى التىن جۇلدەم. جىل سايىن ءوزىمنىڭ كاسىبي شەبەرلىگىمدى شىڭداپ، ءوز دەڭگەيىمدى ارتتىرۋعا كۇش سالىپ كەلەمىن. وسى رەتتە ماعان قولداۋ بىلدىرگەن جانە سەنىم ارتقان باپكەرلەرىم مىڭ العىس. سونداي-اق وسىنداي دودادا ب ا ق سىناۋعا مۇمكىندىك جاساعان ۇلتتىق ۇلان باس قولباسشىسىنا ايتار العىسىم شەكسىز»، دەدى ازامات داۋلەتبەكوۆ.

ۇلتتىق قۇراما كوشباسشىسى فينالدىق كەزدەسۋلەرگە دەيىن، ياعني كۇندىزگى سەسسيادا يراندىق سپورتشى حادي ۆاياەيپۋرانى ۇپاي سانىمەن، ودان كەيىن جارتىلاي فينالدا قىتايلىق پەيلونگ ءليدى 11:0 ەسەبىمەن تازا جەڭگەن بولاتىن.

ەركىن كۇرەستەن قازاقستان قۇراماسى جارىستى 1 التىن، 2 كۇمىس جانە 1 قولا جۇلدەمەن اياقتادى. ەركىن كۇرەس شەبەرلەرى اراسىنان التىن جۇلدەنى ۇلتتىق ۇلان وفيسەرى ازامات داۋلەتبەكوۆ يەلەندى.